सोलापूर|पुणे प्रतिनिधी
शिक्षकांच्या सेवेत पारदर्शकतेसाठी सुरू केलेली शालार्थ आयडी प्रणाली… आणि त्याच आयडीसाठीच अधिकाऱ्यांकडून लाचेखोरी! पुण्यातील विभागीय शिक्षण उपसंचालक कार्यालयातील शिक्षण उपनिरीक्षक रावसाहेब मिरगणे (वय ५७) यांना मंगळवारी संध्याकाळी त्यांच्या स्वतःच्या केबिनमध्ये १ लाखांची लाच स्वीकारताना लाचलुचपत प्रतिबंधक विभागाने रंगेहाथ पकडले. सेवानिवृत्तीला अवघे एक वर्ष बाकी असताना मिरगणे स्वतःच्याच लोभाच्या जाळ्यात अडकले.
विनावेतन सेवेला लाचीची जोड
सोलापूर जिल्ह्यातील एका माध्यमिक शाळेतील सहशिक्षिका २०१६ पासून विनावेतन काम करत होत्या. शालार्थ आयडी मंजूर झाल्यावर त्यांना प्रत्यक्ष वेतन मिळण्याचा मार्ग मोकळा होणार होता. मात्र हा प्रस्ताव ‘ई-ऑफिस’ प्रणालीतून पुढे पाठवून मंजुरीसाठी ‘दर’ ठरवला गेला.
१७ नोव्हेंबरला मिरगणे यांनी शिक्षिकेकडे थेट लाच मागितली. शेवटी २१ नोव्हेंबर रोजी एक लाख रुपयांवर व्यवहार पक्का झाला.
फसवणूक थेट ACB कार्यालयात पोहोचली
शिक्षिकेच्या पतीला हा प्रकार मान्य नसल्याने त्यांनी पुणे लाचलुचपत प्रतिबंधक विभागाकडे तक्रार नोंदवली. पडताळणीत मागणी खरी असल्याचे स्पष्ट झाले. त्यानंतर मंगळवारी सायंकाळी ६.३० च्या सुमारास उपसंचालक कार्यालयात सापळा रचण्यात आला.
साक्षीदारांसमोर स्वीकारला ‘बंद पाकीट’ आणि…
मिरगणे यांनी आपल्या केबिनमध्ये पंचांसमक्ष लाचेची रक्कम स्वीकारताच पथकाने त्यांना ताब्यात घेतले. बंडगार्डन पोलिस ठाण्यात त्यांच्या विरोधात भ्रष्टाचार प्रतिबंधक अधिनियमाअंतर्गत गुन्हा नोंदवला गेला. दुसऱ्या पथकाने त्यांच्या घराची झडतीही घेतली असून, तेथेही काही महत्त्वाचे साहित्य आणि कागदपत्रे मिळाल्याची माहिती सूत्रांकडून समजते.
सेवाजिवनाला ‘काळा डाग’
शिक्षण क्षेत्रातील अनेक सुधारणा, डिजिटल प्रक्रियेचे सुलभीकरण आणि शिक्षकांच्या वेतनाचा पारदर्शक मार्ग… याच प्रक्रियेला पैसे लावण्याचा प्रयत्न झाल्याने या घटनेबद्दल संताप व्यक्त केला जात आहे.
सेवानिवृत्तीच्या वाढदिवसाच्या उंबरठ्यावर असताना, एक लाखाच्या नोटांनी मिरगणे यांचे तीन दशके जुने सेवाकार्य एका क्षणात धुळीस मिळाले.
