पुणे प्रतिनिधी
पुण्यातील आयटी हब म्हणून ओळखल्या जाणाऱ्या हिंजवडी परिसरात बुधवारी घडलेल्या एका प्रकाराने नागरिक स्तब्ध झाले. अंगणवाडी सेविका आणि मदतनीस या दोन कर्मचाऱ्यांनी तब्बल 20 लहान मुलांना खोलीत कोंडून बाहेरून कुलूप लावल्याचा धक्कादायक प्रकार उघड झाला आहे. या घटनेचा सीसीटीव्ही फुटेज सोशल मीडियावर व्हायरल झाल्यानंतर पालकांत संतापाची लाट उसळली आहे.
घटना २६ नोव्हेंबर रोजी सकाळी 11 ते 12 च्या दरम्यान घडली. अंगणवाडी सेविका सविता शिंदे आणि मदतनीस शिल्पा साखरे यांना ग्रामपंचायतीतील एका बैठकीला उपस्थित राहायचे होते. ती बैठक माजी सरपंचांच्या बोलावणीवर होती. त्यावेळी अंगणवाडीत नियमित कामकाज सुरू होते. मात्र मुलांची जबाबदारी सोडून दोन्ही कर्मचारी अंगणवाडीचे दार बाहेरून कुलूप लावून थेट बैठकीसाठी रवाना झाल्या.
तत्पूर्वी तासभर या बंद खोलीत अडकलेल्या लहान मुलांचा आक्रोश दूरवर ऐकू जात होता. भीतीपोटी अनेक मुले रडत होती. या परिस्थितीचा व्हिडिओ समोर आल्यानंतर नागरिकांनी तीव्र प्रतिक्रिया व्यक्त केल्या. अनेकांनी हे कृत्य “मानवी संवेदनांचा घोर अवमान” असल्याचे सांगत संबंधित कर्मचाऱ्यांवर तात्काळ कारवाईची मागणी केली आहे.
घटना समजताच मुळशी पंचायत समितीचे बाल विकास प्रकल्प अधिकारी धनराज गिराम यांना माहिती देण्यात आली. त्यांनी तत्काळ दोन्ही कर्मचाऱ्यांना बैठक सोडून अंगणवाडीत परत जाण्याचे आदेश दिले. त्यानंतरच कुलूप उघडण्यात आले आणि मुलांना बाहेर काढण्यात आले.
लहान मुलांना अशा प्रकारे कोंडून ठेवणे केवळ नियमबाह्य नाही, तर त्यांच्या सुरक्षेलाही गंभीर धोका निर्माण करणारे आहे. आपत्कालीन परिस्थितीत मुलांचा जीव धोक्यात येण्याची शक्यता नाकारता येत नाही.
या पार्श्वभूमीवर बाल विकास प्रकल्प अधिकारी गिराम यांनी कठोर शिस्तभंगात्मक कारवाईची सूचना केली असून प्रकरणाची चौकशी सुरू आहे.
या प्रकारामुळे अंगणवाडी सेवकांच्या जबाबदारी, देखरेख आणि प्रशिक्षणाबाबत मोठे प्रश्नचिन्ह उपस्थित झाले आहे. सरकारी योजनांअंतर्गत चालणाऱ्या बालसंगोपन केंद्रांमध्ये मुलांच्या सुरक्षिततेसाठी अधिक कडक मानके आणि निरीक्षणाची गरज पुन्हा अधोरेखित झाली आहे.
