मुंबई प्रतिनिधी
वरळीतील डॉ. गौरी पालवे-गर्जे आत्महत्या प्रकरणात फरार असलेल्या अनंत गर्जे याला अखेर मध्यरात्री अटक करण्यात आली. रविवारी पहाटे एक वाजता वरळी पोलिसांनी ही कारवाई केली. अनंत गर्जे हे पर्यावरण मंत्री पंकजा मुंडे यांचे स्वीय सहायक (पीए) असल्याने राजकीय वर्तुळातही या प्रकरणाची चर्चा चांगलीच तापली आहे.
शनिवारी उशिरा रात्री डॉ. गौरी यांच्या आत्महत्येची माहिती अनंत गर्जे यांनीच दिली होती. मात्र, रुग्णालयात पत्नीला दाखल करून ते पळून गेले. त्यानंतर त्यांचा शोध घेऊन पोलिसांनी त्याला ताब्यात घेतले.
अनंत आणि गौरी यांचा विवाह यंदा 7 फेब्रुवारी रोजी झाला होता. विवाहाला अवघे काही महिने होत असतानाच गौरीने आत्महत्या केल्याची माहिती समोर आली. मात्र, ही आत्महत्या नसून हत्या असल्याचा संशय मुलीच्या कुटुंबीयांनी व्यक्त केला आहे. गौरीच्या घरच्यांनी वरळी पोलीस ठाण्यात तक्रार नोंदवून अनंत गर्जे आणि त्याच्या कुटुंबीयांवर कारवाईची मागणी केली होती.
घटनास्थळाची पाहणी करून वरळी पोलिसांनी प्रथम अपमृत्यूची नोंद केली होती. मृतदेहाचे शवविच्छेदन करण्यासाठी केईएम रुग्णालयात पाठवण्यात आला. गौरी केईएम रुग्णालयातील दंत विभागात कार्यरत होती, तर दाम्पत्य वरळी बीडीडी चाळीत राहत होते.
दरम्यान, अनंत गर्जे हे मंत्री पंकजा मुंडे यांचे निकटवर्तीय असल्याने त्यांची भूमिका काय असेल, याकडे लक्ष लागले होते. “पीए असला तरी त्याच्यावर गुन्हा दाखल झाला पाहिजे. पंकजा मुंडे यांनी बाजू न घेता पीडितेच्या कुटुंबीयांसोबत उभे राहिले पाहिजे,” अशी मागणी सामाजिक कार्यकर्त्या अंजली दमानिया यांनी केली. तसेच, “गौरीला रुग्णालयात आणताच पोलिसांनी त्याला ताब्यात घेतले पाहिजे होते,” अशी टीकाही त्यांनी केली.
या घटनेमुळे वैवाहिक वाद, राजकीय संबंध आणि पोलिसांच्या तत्परतेबाबत अनेक प्रश्न उभे राहिले असून पुढील तपासानंतर या प्रकरणाचा नेमका स्वरूप स्पष्ट होणार आहे.
