मुंबई प्रतिनिधी
मुंबई : धारावीतील ९० फूट रोडवरील कामराज स्कूल परिसरात रविवारी भाजपातर्फे आयोजित करण्यात आलेली भव्य सभा उत्साहपूर्ण वातावरणात पार पडली. आमदार तमिळ सेल्वन यांच्या प्रमुख उपस्थितीत झालेल्या या सभेला मंत्री आशिष शेलार, तालुका- म mandal-वार्ड पातळीवरील पदाधिकारी, कार्यकर्ते आणि मोठ्या संख्येने धारावीकरांनी उपस्थिती लावली.
या सभेचा केंद्रबिंदू होता धारावी पुनर्विकास प्रकल्प (डीआरपी). गेल्या दोन दशकांपासून विविध सरकारांच्या बदलत्या निर्णयांमुळे धारावीकरांमध्ये पुनर्विकासाबाबत निर्माण झालेल्या गैरसमजांना दूर करण्याची गरज असल्याचे वक्त्यांनी यावेळी स्पष्ट केले.
मंत्री आशिष शेलार आणि आमदार तमिळ सेल्वन यांनी प्रकल्पाची प्रक्रिया उलगडून सांगताना,
“मुख्यमंत्री देवेंद्र फडणवीस यांच्या पुढाकारामुळे धारावीतील रहिवासी, दुकानदार आणि लघुउद्योजकांसाठी आतल्या परिसरातच नव्या इमारतींचे काम सुरू आहे. पुनर्विकासानंतर प्रत्येक स्थानिकाला सुधारित घरे आणि व्यवसायिक जागा मिळणार आहेत,” असे सांगितले.
यावेळी विरोधकांकडून पुनर्विकासाबाबत पसरवल्या जाणाऱ्या गैरसमज, अफवा आणि दिशाभूल करणाऱ्या माहितीवर नेत्यांनी टीका केली. नागरिकांचे प्रश्न ऐकून त्यांना दिलेली थेट उत्तरे हा या सभेचा विशेष भाग ठरला.
दुसऱ्या सत्रात धारावीकरांसाठी नवी घरे उपलब्ध करून देण्याच्या प्रयत्नाबद्दल मुख्यमंत्री फडणवीस यांचे आभार व्यक्त करण्यात आले. मोठ्या संख्येने जमलेल्या नागरिकांच्या उपस्थितीमुळे सभेला उत्साहाची ‘उर्जा’ प्राप्त झाली.
