पुणे प्रतिनिधी
मुंबई–सोलापूर वंदे भारत एक्सप्रेसला अखेर दौंड स्थानकाचा थांबा मिळाला असून २४ नोव्हेंबरपासून हा बदल लागू होणार आहे. मध्य रेल्वेने घेतलेल्या या निर्णयामुळे गेली दोन वर्षे सुरू असलेली स्थानिकांची मागणी आणि लोकप्रतिनिधींचा पाठपुरावा अखेर फळाला आला आहे.
दौंड, बारामती, इंदापूर, फलटण, खटाव, करमाळा, माढा, माळशिरस अशा मोठ्या पट्ट्यातील लाखो प्रवाशांना या निर्णयामुळे मोठा दिलासा मिळणार आहे. आतापर्यंत वंदे भारतने प्रवास करण्यासाठी प्रवाशांना थेट पुणे किंवा सोलापूर गाठावे लागत होते. पुणे–सोलापूर मार्गावर मध्यवर्ती मानल्या जाणाऱ्या दौंडमधून आता थेट वंदे भारतचा लाभ घेता येणार आहे.
१० फेब्रुवारी २०२३ रोजी सुरु झालेल्या सोलापूर–मुंबई वंदे भारत एक्सप्रेसने दोन्ही शहरांमधील प्रवास केवळ ६ तास ४५ मिनिटांवर आणला आहे. दौंड–भिगवण–फलटण परिसर औद्योगिकदृष्ट्या महत्त्वाचा समजला जातो. साखर कारखाने, औषध निर्मिती उद्योग, तसेच व्यवसायानिमित्त वारंवार मुंबईला जाणाऱ्यांसाठी आता अधिक वेगवान आणि सोयीस्कर प्रवासाचा मार्ग खुला होणार आहे. परिणामी उद्योग–व्यवसाय आणि कृषी क्षेत्रालाही याचा फायदा होणार असल्याचे मानले जाते.
डेमू प्रवाशांसाठीही दिलासा
पुणे–दौंड–सोलापूर मार्गावर धावणाऱ्या डेमू गाड्यांमध्ये वारंवार तांत्रिक बिघाड आणि उशिरामुळे प्रवाशी त्रस्त होते. त्यामुळे दीड-दोन वर्षांपासून वंदे भारतला दौंडचा थांबा द्यावा, अशी जोरदार मागणी होत होती. राष्ट्रवादी काँग्रेसच्या (शरद पवार गट) खासदार सुप्रिया सुळे यांनीदेखील रेल्वेमंत्री आश्विनी वैष्णव यांच्याकडे या मागणीसाठी पाठपुरावा केला होता. अखेर मध्य रेल्वेने या प्रस्तावाला मंजुरी देत प्रवाशांच्या मागणीची पूर्तता केली आहे.
अशी असेल वेळ
• मुंबई → दौंड : रात्री ८.१३ आगमन, ८.१५ प्रस्थान
• सोलापूर → दौंड : सकाळी ८.०८ आगमन, ८.१० प्रस्थान
रेल्वे बोर्ड आणि मध्य रेल्वेने निश्चित केलेल्या इतर थांब्यांच्या वेळा यथावत राहणार असल्याची माहिती सोलापूर विभागाचे वरिष्ठ विभागीय वाणिज्य व्यवस्थापक योगेश पाटील यांनी दिली. प्रवाशांनी नवीन थांब्याचा लाभ घ्यावा, असे आवाहनही त्यांनी केले आहे.
