पुणे प्रतिनिधी
राज्य मार्ग परिवहन महामंडळाने (एसटी) वाढत्या खर्चावर नियंत्रण ठेवण्यासाठी चालक-वाहकांच्या ओव्हरटाइम भत्त्याच्या नियमावलीत मोठा बदल केला आहे. आतापर्यंत मर्जीतील कर्मचाऱ्यांना मिळणारा ओव्हरटाइम आता ठराविक नियमांनुसारच वाटप केला जाणार असून, कोणताही भेदभाव आढळल्यास अधिकाऱ्यांवरच कारवाई होणार आहे. परिणामी, एसटी कर्मचाऱ्यांमध्ये एकच खळबळ उडाली आहे.
परिवहन मंत्री प्रताप सरनाईक यांनी दैनंदिन उत्पन्न वाढवण्याच्या दृष्टीने घेतलेल्या आढावा बैठकीत ओव्हरटाइमवर होणाऱ्या प्रचंड खर्चाबाबत तक्रारी समोर आल्या. काही ठराविक कर्मचाऱ्यांना ‘आर्थिक देवाणघेवाणीच्या बदल्यात’ ओव्हरटाइम दिल्याचे आरोप करण्यात आले. त्या पार्श्वभूमीवर व्यवस्थापनाकडून नव्या प्रमाण नियमांची अंमलबजावणी करण्याचे आदेश देण्यात आले आहेत.
अ, ब, क गटवारी अनिवार्य
आगारांनी चालक आणि वाहकांची अ, ब, क अशी वर्गवारी करून स्वतंत्र नोंद ठेवणे बंधनकारक केले आहे. ओव्हरटाइमसाठी क गटातील, म्हणजे कमी ओव्हरटाइम दर असलेल्या कर्मचाऱ्यांना प्राधान्य देण्याचे निर्देश आहेत. कर्मचारी अपुरे असल्यास ‘प्लॅन डबल ड्युटी’चा पर्याय वापरता येणार आहे. त्यासाठी इच्छुक आणि कमी वेतनाच्या कर्मचाऱ्यांना अग्रक्रम देऊन मासिक आराखडा तयार करावा, असे आदेश दिले आहेत.
डबल ड्युटीचे वेळापत्रक किमान दहा दिवस आधी नोटीस बोर्डवर लावणे आगारांना अनिवार्य करणार आहे. ओव्हरटाइमसंबंधी संपूर्ण प्रक्रिया पारदर्शक करण्यासाठी स्वतंत्र नोंदवही ठेवावी लागणार असून, त्यात कर्मचारी नाव, बिल्ला क्रमांक, तासाचा दर आणि एकूण रक्कम यांची स्पष्ट नोंद असावी, असे महाव्यवस्थापक (वाहतूक) यांनी आदेशित केले आहे.
सुट्टी रद्द करण्यावर स्पष्ट बंदी
एसटी कर्मचाऱ्यांच्या साप्ताहिक सुट्टी रद्द करण्यावर आता स्पष्ट बंदी घालण्यात आली आहे. कोणत्याही परिस्थितीत चालक-वाहकांची सुट्टी रद्द करू नये; तसे झाल्यास संबंधित पर्यवेक्षकावरच कारवाई होणार आहे.
वारंवार गैरहजर राहणाऱ्या आणि गर्दीच्या दिवशी किंवा सणासुदीला रजा घेणाऱ्या कर्मचाऱ्यांवरही आता ‘करडी नजर’ ठेवली जाणार आहे. अशा कर्मचाऱ्यांच्या रजेच्या कलाचा विशेष अभ्यास करून त्यावर आळा घालण्यासाठी संबंधित अधिकाऱ्यांना निर्देश देण्यात आले आहेत.
नव्या नियमावलीमुळे ओव्हरटाइमचे वाटप अधिक संगतवार आणि पारदर्शक होईल, असा दावा एसटी प्रशासनाने केला असला तरी, कर्मचाऱ्यांमध्ये मात्र नाराजीचे सूर उमटू लागले आहेत.
