पुणे प्रतिनिधी
महाराष्ट्रात गेल्या काही दिवसांपासून जाणवणारा तीव्र थंडीचा जोर आता कमी होणार असल्याचे भारतीय हवामानशास्त्र विभागाने स्पष्ट केले आहे. पुढील २४ तासांत कोकण-गोवा तसेच मध्य महाराष्ट्रातील निवडक ठिकाणी हलक्या सरींचा अंदाज असून त्यानंतर राज्यात तापमानात वाढ होण्याची शक्यता व्यक्त करण्यात आली आहे.
अहिल्यानगरमध्ये आज किमान तापमानाची सर्वात कमी ९.४ अंश सेल्सिअस नोंद झाली. लक्षद्वीप बेटे आणि लगतच्या मालदीव परिसरातील कमी दाबाचा पट्टा सध्या अग्नेय अरबी समुद्रावर सक्रिय असल्याने राज्याच्या बहुतेक भागात हवामान कोरडे राहणार आहे.
२२ ते २४ नोव्हेंबरला पावसाची शक्यता
हवामान खात्याच्या अंदाजानुसार, २२ आणि २३ नोव्हेंबरला कोकण-गोव्यात तर २२ ते २४ नोव्हेंबरदरम्यान मध्य महाराष्ट्रातील तुरळक भागांत हलक्या सरींचा इशारा देण्यात आला आहे. या पावसाच्या पार्श्वभूमीवर राज्यभरातील कमाल व किमान तापमानात एक ते दोन अंशांनी वाढ होणार आहे.
अवकाळी पावसाचा परिणाम म्हणून मध्य महाराष्ट्र, मराठवाडा आणि विदर्भात पुढील दोन ते चार दिवस किमान तापमानामध्ये वाढ होण्याचा अंदाज आहे. मागील दोन दिवसांत तापमानात वाढ झाल्यानंतर ७ अंशांपर्यंत खाली गेलेला पारा पुन्हा ९ ते १२ अंशांच्या दरम्यान स्थिरावल्याचे निरीक्षणात आले आहे.
राज्यातील प्रमुख शहरांचे किमान तापमान (अंश सेल्सिअस)
अहिल्यानगर – ९.४
पुणे, वाशिम – ११
जळगाव – ११.२
गोंदिया, यवतमाळ – ११.६
छत्रपती संभाजीनगर – ११.९
परभणी – १२
नागपूर – १२.२
महाबळेश्वर – १२.४
अमरावती – १२.७
अकोला – १२.८
बुलढाणा – १३
दरम्यान, हवामान विभागाने नागरिकांनी सध्या तापमानातील बदलांना अनुसरून आरोग्याची काळजी घ्यावी, असा सल्ला दिला आहे.
