पुणे प्रतिनिधी
पुणे : राज्यातील महापालिका, नगरपरिषद आणि नगरपंचायतींच्या निवडणुकांमुळे पॉलिटेक्निक विद्यार्थ्यांसाठी महत्त्वाची माहिती समोर आली आहे. महाराष्ट्र राज्य तंत्र शिक्षण मंडळाने (एमएसबीटीई) डिसेंबरमध्ये होणाऱ्या लेखी परीक्षांच्या वेळापत्रकात तातडीने बदल जाहीर केला आहे.
राज्यात २ डिसेंबर रोजी नगरपालिका निवडणुका होत असल्याने शैक्षणिक संस्थांच्या इमारती व वर्गखोल्या प्रशासनाने निवडणुकीसाठी ताब्यात घेतल्या आहेत. त्यामुळे निवडणुकीच्या आदल्या दिवशी, प्रत्यक्ष मतदानाच्या दिवशी आणि त्यानंतरच्या दिवशी परीक्षा घेणे शक्य नसल्याचे मंडळाने स्पष्ट केले आहे.
यामुळे १ आणि २ डिसेंबर रोजी होणाऱ्या पॉलिटेक्निकच्या परीक्षा पुढे ढकलण्यात आल्या आहेत. सुधारित वेळापत्रकानुसार १ डिसेंबरची परीक्षा ४ डिसेंबरला, तर २ डिसेंबरची परीक्षा ५ डिसेंबरला घेण्यात येणार आहे. विद्यार्थ्यांनी नव्या तारखांनुसार नियोजन करावे, असे आवाहन एमएसबीटीईचे सचिव उमेश नागदेवे यांनी केले आहे.
मुंबई, पुणे, नागपूर आणि छत्रपती संभाजीनगर विभागीय कार्यक्षेत्रात हा बदल लागू होणार असल्याची माहितीही नागदेवे यांनी दिली. पॉलिटेक्निक अभ्यासक्रमातील हजारो विद्यार्थ्यांवर याचा थेट परिणाम होणार असून, अचानक बदलामुळे अनेकजण आश्चर्यचकित झाले आहेत. तरीही निवडणूक प्रक्रियेतील अनिवार्य ताब्यातकीमुळे हा निर्णय अपरिहार्य असल्याचे एमएसबीटीईने स्पष्ट केले आहे.
