पुणे प्रतिनिधी
शहरात काहीसा उशिराने दाखल झालेली थंडी आता चांगलीच स्थिरावली आहे. मागील आठवड्यापासून गारठ्यात सातत्याने वाढ होत असून, रात्रीच्या वेळी पारा १५ अंशांखाली घसरू लागला आहे. मध्यरात्रीनंतर हुडहुडी भरवणारी थंडी कायम राहणार असल्याचा अंदाज वेधशाळेने वर्तवला आहे.
मंगळवारी पहाटे दाट धुके पडले होते. सकाळी सातपर्यंत थंडीची कडाक्याची जाणीव होत होती. या वेळी तापमान १२ अंश सेल्सिअसपर्यंत खाली आले. त्यानंतर ऊन पडले असले तरी वातावरणातील गारवा मात्र कायम राहिला. दुपारी तीनच्या सुमारास तापमान २९ अंशांपर्यंत चढले; परंतु सायंकाळी पुन्हा पारा घसरू लागला. रात्री आठला २२ अंशांवर आलेले तापमान मध्यरात्रीनंतर १७ अंशांपर्यंत खाली गेले. पहाटे दोनच्या सुमारास तापमान १५ अंशांवर स्थिरावले.
पुढील आठ दिवस थंडीची तीव्रता कायम राहणार असून, सकाळ-रात्रीचा गारठा अधिक जाणवेल, असा अंदाज हवामान खात्याने व्यक्त केला आहे.
थंडीमुळे हवेतील धुलीकणांचे प्रमाण वाढत असल्याचेही निरीक्षणांत आले आहे. हवा जड झाल्याने हे कण हवेतच साचून राहतात. अशा परिस्थितीत दम्याचे रुग्ण, ज्येष्ठ नागरिक तसेच लहान मुलांनी विशेष काळजी घ्यावी, असा सल्ला डॉक्टरांनी दिला आहे.
