पुणे प्रतिनिधी
पुणे शहरात गेल्या काही दिवसांपासून सुरू असलेल्या हत्यासत्राने नागरिकांच्या सुरक्षेचा प्रश्न पुन्हा ऐरणीवर आणला आहे. कायदा-सुव्यवस्थेवर प्रश्नचिन्ह उपस्थित करणाऱ्या सलग घटनांच्या पार्श्वभूमीवर सिंहगड रोड परिसरात भरदिवसा झालेल्या एका तरुणाच्या खुनाने खळबळ उडाली आहे. दगडाने ठेचून करण्यात आलेल्या या क्रूर हत्येमुळे परिसरात तणावाचे वातावरण पसरले आहे.
घटनास्थळी काय घडले?
मिळालेल्या माहितीनुसार, सिंहगड कॉलेज जवळील कृष्णकुंज सोसायटीत सोमवारी दुपारी ही घटना घडली. तौफीर शेख (वय अंदाजे २० वर्षांपेक्षा कमी) असे मृत तरुणाचे नाव आहे. सुमारे पाच जणांच्या टोळीने त्याला आधी बेदम मारहाण केली. त्यानंतर कोयत्याने वार करून दगडाने ठेचून त्याचा खून केल्याची माहिती पोलिसांनी दिली. घटनेनंतर परिसरात एकच गोंधळ उडाला. नागरिकांनी दिलेल्या माहितीवरून पोलीस आणि फॉरेन्सिक पथकाने तातडीने घटनास्थळी धाव घेतली.
घटनास्थळी रक्ताचे डाग, दगडाचे तुकडे आणि झटापटीचे काही पुरावे आढळून आले असून त्यांचा फॉरेन्सिक तपास सुरू आहे. पोलिसांनी परिसरातील सीसीटीव्ही फुटेजही जप्त केले आहे.
पोलिसांची प्राथमिक माहिती
डीसीपी संभाजी कदम यांनी दिलेल्या माहितीनुसार, हल्लेखोरांपैकी काहीजण अल्पवयीन असून दोन जणांवर यापूर्वीही गुन्हे दाखल आहेत. मृत तौफीर शेख याच्याविरोधातही चार गुन्हे नोंदवलेले असल्याचे सांगण्यात आले आहे. भारती विद्यापीठ पोलीस ठाण्यात त्याच्याविरोधात खुनाचा एक गुन्हाही दाखल होता.
त्यामुळे ही हत्या पूर्ववैमनस्यातून किंवा बदला म्हणून घडवून आणली का, याचीही चौकशी सुरू आहे. आरोपींचा शोध घेण्यासाठी विशेष पथकाची नियुक्ती करण्यात आली असून काही संशयितांची नावे पोलिसांना मिळाल्याचे समजते.
कायदा-सुव्यवस्थेवर प्रश्नचिन्ह
अलीकडील काळात पुण्यात दिवसाढवळ्या होणाऱ्या गंभीर गुन्ह्यांच्या घटना वाढल्याने नागरिकांमध्ये भीतीचे वातावरण आहे. पोलिस यंत्रणा नेमकी करतीये तरी काय, कायद्याचा धाक राहिलेला नाही, अशा स्वरात टीकाही ऐकू येत आहे.
सिंहगड रोड परिसरात झालेल्या या निर्घृण हत्येमुळे शहरातील गुन्हेगारीचा मुद्दा पुन्हा एकदा ऐरणीवर आला असून आरोपी लवकरात लवकर गजाआड करण्याचे आव्हान पोलीस यंत्रणेपुढे उभे राहिले आहे.
