पुणे प्रतिनिधी
पुणे शहरातील दिवसेंदिवस वाढत असलेल्या वाहतूक कोंडीवर तोडगा काढण्यासाठी शहर पोलिसांनी खासगी ट्रॅव्हल्स आणि लक्झरी बस ऑपरेटरांसाठी नवीन मार्ग, पर्यायी थांबे तसेच पिक अवर्समध्ये कडक निर्बंध लागू केले आहेत. १५ नोव्हेंबरपासून या नियमांची प्राथमिक अंमलबजावणी सुरू झाली असून, पुढील पंधरा दिवस नागरिक, संस्था व बस ऑपरेटरांकडून हरकती–सूचना मागविण्यात येणार आहेत. त्यानंतर अंतिम आदेश जाहीर केला जाणार असल्याची माहिती अतिरिक्त पोलिस आयुक्त मनोज पाटील आणि पोलिस उपायुक्त हिंमत जाधव यांनी दिली.
वाहतूक शाखेच्या कार्यालयात नुकत्याच झालेल्या बैठकीत ट्रॅव्हल्स असोसिएशनच्या प्रतिनिधींशी चर्चा करण्यात आली. पिक अवर्सदरम्यान रस्त्यांवर निर्माण होणारी अनावश्यक गर्दी, अनधिकृत थांबे आणि वाहतूक कोंडीचा वाढता प्रश्‍न याची दखल घेऊन नवा मार्गदर्शक आदेश काढण्यात आला आहे.
शहरातून सुटणाऱ्या लक्झरी बसेससाठी नवे मार्ग
१) मित्रमंडळ चौक (स्वारगेट) – सातारा रस्ता
थांबे: मित्रमंडळ चौक, कात्रज सर्प उद्यान
मार्ग: व्होल्गा चौक – मार्केटयार्ड – सातारा रस्ता – कात्रज चौक – नवले पूल – नविन कात्रज बोगदा
२) पद्मावती पार्किंग – सोलापूर रस्ता
थांबे: भैरोबानाला, शेवाळवाडी
मार्ग: व्होल्गा चौक – सातारा रस्ता – मार्केटयार्ड चौक – वखार महामंडळ – गंगाधाम – लुल्लानगर – वानवडी – भैरोबानाला – पेट्रोल पंप – युटर्न – हडपसर
३) पद्मावती पार्किंग – मुंबई-पुणे महामार्ग
मार्ग: दांडेकर पूल – सेनादत्त चौक – म्हात्रे पूल – नळस्टॉप – पौड रस्ता – चांदणी चौक – मुंबई-पुणे हायवे
अतिरिक्त थांबा: नाही
४) अहिल्यानगर रस्ता (संगमवाडी पार्किंग)
मार्ग: सादलबाबा चौक – आंबेडकर चौक – गोल्फ चौक – शास्त्रीनगर – नगर रस्ता – वाघोली
अतिरिक्त थांबे: खराडी बायपास, वाघेश्वर पार्किंग
५) वारजे जंक्शन – अहिल्यानगर रस्ता
मार्ग: आंबेडकर चौक – कर्वे रस्ता – पौड फाटा – एसएनडीटी – सेनापती बापट रस्ता – संचेती चौक – संगमवाडी – सादलबाबा चौक – गोल्फ चौक – शास्त्रीनगर – नगर रस्ता – वाघोली
बाहेरील शहरांतून येणाऱ्या बसेससाठी नियम
मुंबई – आळंदी/वाघोली रस्ता
थांबे: संगमवाडी, खराडी, वाघेश्वर पार्किंग
मुंबई – सोलापूर रस्ता
थांबे: संगमवाडी, खराडी बायपास, शेवाळवाडी
मुंबई – सातारा रस्ता
शहरात प्रवेशाला मज्जाव; पुणे–बंगळूर बायपासमार्गेच पुढील प्रवास.
महत्त्वाचे निर्बंध
निश्चित केलेल्या मार्गाव्यतिरिक्त शहरात प्रवेशास बंदी
सायंकाळी ६ ते १० पिक अवर्समध्ये कोणत्याही लक्झरी बसला शहरात प्रवेश नाही
बसथांब्यावर ३ मिनिटांपेक्षा जास्त थांबण्यास मनाई
वाहतूक पोलिसांनी दिलेल्या माहितीनुसार, या नवीन बदलांमुळे गर्दीवर काही प्रमाणात नियंत्रण येईल आणि मुख्य रस्त्यांवरील वाहतुकीचा ताणही कमी होईल अशी अपेक्षा आहे. नागरिकांकडून येणाऱ्या सूचनांनुसार अंतिम आदेश लवकरच जाहीर होणार आहे.
