नवी दिल्ली पटना.
बिहार विधानसभा निवडणुकीत भाजप नेतृत्वाखालील एनडीएने प्रचंड बहुमत मिळवत सत्ता राखली, तर महाआघाडीचा दारूण पराभव झाला. राज्यात भाजप हा सर्वात मोठा पक्ष ठरला असून काँग्रेसची कामगिरी अपेक्षेपेक्षा अधिकच निराशाजनक ठरली आहे. या पार्श्वभूमीवर पंतप्रधान नरेंद्र मोदी यांनी केलेल्या विधानामुळे देशाच्या राजकारणात नवा वाद सुरू झाला आहे.
एनडीएच्या ऐतिहासिक विजयानंतर दिल्लीतील काँग्रेस मुख्यालयाजवळील विजय जल्लोष कार्यक्रमात संबोधित करताना मोदींनी काँग्रेसवर जोरदार टीकास्त्र सोडलं. “काँग्रेसकडे देशासाठी कोणताही सकारात्मक दृष्टीकोन नाही. आज काँग्रेस मुस्लिम लीगी-माओवादी काँग्रेस म्हणजे एमएमसी बनली आहे,” अशी कडवी टीका करत मोदींनी काँग्रेसच्या नेतृत्वावर थेट प्रहार केला.
मोदी यावेळी पुढे म्हणाले, “काँग्रेसचे नामदार पक्षाला ज्या दिशेने नेत आहेत, त्याविषयी आतमध्येच मोठ्या प्रमाणात निराशा आणि नाराजी वाढत आहे. भविष्यात काँग्रेसमध्ये आणखी एक मोठं विभाजन होण्याची शक्यता नाकारता येत नाही,” असे विधान करत त्यांनी राजकीय वर्तुळात चर्चा रंगवली आहे.
फक्त काँग्रेसपुरतेच न थांबता त्यांनी मित्रपक्षांनाही इशारा दिला. “काँग्रेसची निगेटीव्ह पॉलिटिक्स सर्वांना घेऊन बुडवत आहे. काँग्रेस ही एक लायबिलिटी आहे, परजीवी पक्ष आहे. आपल्या सहकाऱ्यांची मतं गिळून स्वतःची पुनरागमनाची संभावना शोधते,” अशा शब्दांत मोदींनी महाआघाडीवर थेट निशाणा साधला.
मोदींच्या या विधानांमुळे काँग्रेसमध्ये आणखी खळबळ माजली असून, पक्षाच्या पुढील धोरणांबाबत नव्या चर्चांना उधाण आलं आहे. बिहार निकालानंतर काँग्रेसच्या नेतृत्वावर प्रश्नचिन्ह निर्माण होत असताना, पंतप्रधानांच्या विधानांनी या विवादाला अधिकच तोंड फोडल्याचं स्पष्ट दिसत आहे.
