जळगाव प्रतिनिधी
जळगाव जिल्ह्यातील जामनेर येथे एक धक्कादायक घटना उघडकीस आली आहे. प्रकाशचंद्र जैन बहुउद्देशीय संस्थेचे संचालक राजकुमार कावडिया (वय 52) यांनी विषप्राशन करून आत्महत्या केली आहे. या घटनेमुळे परिसरात हळहळ व्यक्त होत आहे.
मिळालेल्या माहितीनुसार, काही महिन्यांपूर्वी संस्थेच्या आयुर्वेदिक, फिजिओथेरपी आणि होमिओपॅथी वैद्यकीय महाविद्यालयाची परवानगी शासनाने रद्द केली होती. त्याचबरोबर संबंधित इमारती पाडण्याचे आदेशही जारी करण्यात आले होते. या पार्श्वभूमीवर संस्थेवर प्रशासकीय कारवाई सुरू होती.
दरम्यान, शनिवारी संध्याकाळी कावडिया यांनी आपल्या निवासस्थानी विष प्राशन केले. त्यानंतर त्यांना तातडीने जळगावमधील खाजगी रुग्णालयात दाखल करण्यात आले. मात्र उपचारादरम्यान त्यांचा मृत्यू झाला.
आत्महत्येमागचं नेमकं कारण अद्याप स्पष्ट झालेलं नसून, पोलिसांनी घटनेचा तपास सुरू केला आहे. राजकुमार कावडिया यांच्या मृत्यूने शैक्षणिक आणि सामाजिक वर्तुळात शोककळा पसरली आहे.
