सातारा प्रतिनिधी
सातारा जिल्ह्यातील पोलिस दलात फेरबदल करण्यात आले असून, पोलिस निरीक्षक व सहायक निरीक्षकांच्या जिल्ह्यांतर्गत तसेच जिल्ह्याबाहेरील बदल्या आदेश शुक्रवारी जारी करण्यात आले. जिल्हा पोलिस अधीक्षक तुषार दोशी यांचे रीडर असलेले सहाय्यक पोलिस निरीक्षक रवींद्र तेलतुंबडे यांची बदली मुंबई शहर पोलिस दलात करण्यात आली आहे.
तसेच, अतिरिक्त पोलिस अधीक्षक डॉ. वैशाली कडूकर यांच्या रीडरपदी कार्यरत असलेले सहाय्यक निरीक्षक वाय. के. धनवे यांची बदली फोर्स वन, मुंबई येथे करण्यात आली आहे. सातारा शहर पोलिस ठाण्याच्या गुन्हे प्रकटीकरण पथकाचे प्रभारी सहाय्यक निरीक्षक श्याम काळे यांची राज्य अन्वेषण विभाग, पुणे येथे पदोन्नतीवर बदली झाली आहे.
दरम्यान, भुईंज पोलिस ठाण्याचे निरीक्षक रमेश गरजे यांची प्रारंभी बदली मुंबईला करण्यात आली होती; मात्र त्यांच्या विनंतीवरून त्यांना सायबर पोलिस ठाण्याचा चार्ज देण्यात आला आहे. पोलिस निरीक्षक संदीप जगताप यांची बदली पोलिस मुख्यालयातून फलटण ग्रामीण येथे करण्यात आली असून, फलटण ग्रामीणचे निरीक्षक हेमंत शहा यांना आर्थिक गुन्हे शाखेत बदली देण्यात आली आहे.
याशिवाय, मेढा पोलिस ठाण्याचे निरीक्षक पृथ्वीराज साठे यांची बदली भुईंज पोलिस ठाण्यात करण्यात आली आहे. तसेच सहाय्यक निरीक्षक वाय. के. चौधरी यांची बदली नागपूर शहर पोलिस दलात झाली आहे.
या बदल्यांमुळे जिल्ह्यातील पोलिस प्रशासनात नव्या जबाबदाऱ्यांची फेरमांडणी झाली असून, कार्यक्षमतेत वाढ होण्याची अपेक्षा व्यक्त केली जात आहे.
