नवी मुंबई प्रतिनिधी
बहुप्रतीक्षित नवी मुंबई आंतरराष्ट्रीय विमानतळाचे (NMIA) स्वप्न अखेर साकार होत आहे. बुधवारी (दि. ८ ऑक्टोबर) दुपारी पंतप्रधान नरेंद्र मोदी यांच्या हस्ते या विमानतळाच्या पहिल्या टप्प्याचे भव्य उद्घाटन होणार आहे. दुपारी सुमारे २.४० वाजता होणारा हा सोहळा महाराष्ट्राच्या पायाभूत सुविधांच्या इतिहासातील एक महत्त्वपूर्ण अध्याय ठरणार आहे.
या निमित्ताने नवी मुंबई वाहतूक पोलिसांनी मोठ्या प्रमाणावर वाहतूक निर्बंध लागू केले असून, बुधवारी सकाळी ६ पासून रात्री १० पर्यंत हे निर्बंध प्रभावी राहणार आहेत. शहरात कायदा-सुव्यवस्था व सुरक्षेच्या पार्श्वभूमीवर पोलिसांचा कडक बंदोबस्त तैनात करण्यात आला आहे.
• मोठ्या वाहनांना पूर्ण बंदी
वाहतूक विभागाच्या आदेशानुसार सर्व प्रकारच्या जड मालवाहतूक वाहनांना नवी मुंबईत प्रवेश, प्रवास किंवा पार्किंग करण्यास बंदी असेल.
मुंबईहून येणाऱ्या वाहनांना अटल सेतूपासून पुढे जाता येणार नाही.
वाशी व ऐरोली टोल नाक्यांवर ट्रक-ट्रेलर थांबवण्यात येतील.
पंतप्रधानांच्या ताफ्याच्या सुरक्षेसाठी आणि वाहतूक कोंडी टाळण्यासाठी विशेष मार्ग व डायवर्जन योजना आखण्यात आली आहे.
• पोलिसांचा कडक बंदोबस्त
मुख्य रस्ते, विमानतळ परिसर आणि महत्त्वाच्या ठिकाणी मोठ्या प्रमाणावर पोलिस फौज तैनात असेल. वाहतूक नियंत्रणासाठी अधिकाऱ्यांना सतत लक्ष ठेवण्याचे आदेश देण्यात आले आहेत. समारंभासाठी येणाऱ्या पाहुण्यांसाठी विशेष पार्किंग व्यवस्था करण्यात आली आहे.
• अत्यावश्यक सेवांना सूट
वाहतूक निर्बंधांपासून रुग्णवाहिका, अग्निशमन दल, पोलिस वाहने, तसेच सार्वजनिक व सरकारी वाहनांना सूट असेल. नागरिकांना मात्र प्रवासाचे आगाऊ नियोजन करून पोलिसांना सहकार्य करण्याचे आवाहन प्रशासनाने केले आहे.
• ऐतिहासिक टप्पा
नवी मुंबई आंतरराष्ट्रीय विमानतळाचे उद्घाटन हे मुंबई महानगर प्रदेशाच्या वाहतूक व्यवस्थेत ऐतिहासिक टप्पा ठरणार आहे. डिसेंबर २०२५ पर्यंत हे विमानतळ पूर्ण क्षमतेने कार्यान्वित होईल. मुंबईच्या छत्रपती शिवाजी महाराज आंतरराष्ट्रीय विमानतळावरील ताण कमी करण्यासोबतच नवी मुंबई व आसपासच्या भागांच्या कनेक्टिव्हिटीला मोठी गती मिळणार आहे.
नागरिकांच्या दैनंदिन जीवनात बदल घडविणारा हा प्रकल्प केवळ विमानतळापुरता मर्यादित न राहता, महाराष्ट्राच्या आर्थिक आणि सामाजिक विकासाला नवा वेग देईल, अशी अपेक्षा व्यक्त होत आहे.
