कोल्हापूर प्रतिनिधी
राष्ट्रीय संस्थात्मक रँकिंग फ्रेमवर्क (NIRF-2025) मध्ये शिवाजी विद्यापीठाने उल्लेखनीय कामगिरी करत राज्य सार्वजनिक विद्यापीठांच्या देशस्तरीय यादीत ‘टॉप-50’मध्ये स्थान मिळवले आहे. विद्यापीठाला या यादीत 45 वा क्रमांक मिळाला असून, त्यासाठी 51.80 असे गुणांकन मिळाले आहे, अशी माहिती प्र-कुलगुरू डॉ. पी. एस. पाटील यांनी दिली.
सन 2016 पासून केंद्र सरकारच्या शिक्षण मंत्रालयामार्फत ही क्रमवारी जाहीर केली जाते. पहिल्याच वर्षापासून शिवाजी विद्यापीठ देशातील 200 आघाडीच्या विद्यापीठांत सातत्याने आहे. वाढत्या स्पर्धेतही या वर्षी विद्यापीठाने 151-200 या रँकबँडमध्ये आपले स्थान टिकवले आहे.
राज्य विद्यापीठांच्या क्रमवारीत झेप
गतवर्षी NIRFने राज्य सार्वजनिक विद्यापीठांची स्वतंत्र क्रमवारी जाहीर करण्यास सुरुवात केली होती. त्यात शिवाजी विद्यापीठ 51-100 या गटात होते. यंदा या क्रमवारीत पुढे झेप घेत टॉप-50मध्ये स्थान मिळवत 45 व्या स्थानी पोहोचले.
या यादीत महाराष्ट्रातील चार विद्यापीठांचा समावेश आहे. त्यात सावित्रीबाई फुले पुणे विद्यापीठ (11 वा क्रमांक), मुंबई विद्यापीठ (12 वा क्रमांक), पुण्याचे सीओईपी तंत्रज्ञान विद्यापीठ (43 वा क्रमांक) आणि शिवाजी विद्यापीठ (45 वा क्रमांक) अशी नावे आहेत.
कोणत्या निकषांवर आधारित?
NIRF रँकिंग अध्यापन-अध्ययन प्रक्रिया, संशोधन व व्यावसायिक कृतीशीलता, विद्यार्थ्यांचे यशाचे प्रमाण, समाजघटकांपर्यंत शिक्षण पोहोचविण्याचे प्रयत्न, तसेच शैक्षणिक संवाद-समन्वय यांसारख्या विविध घटकांवर आधारित असते. अभियांत्रिकी, व्यवस्थापन, फार्मसी, कायदा, वैद्यकीय, कृषी, नाविन्यता, कौशल्य विकास आदी क्षेत्रांतील शैक्षणिक संस्थांचाही या क्रमवारीत समावेश होतो.
“ही सामूहिक मेहनतीचे फलित”
“गेल्या काही वर्षांत शिक्षक, संशोधक आणि विद्यापीठातील सर्व घटकांनी एनआयआरएफच्या निकषांनुसार सातत्याने काम केले. राष्ट्रीय स्तरावरील या यशामुळे विद्यापीठाने अभिमानास्पद झेप घेतली आहे. भविष्यात आणखी उंची गाठण्यासाठी सर्वांनी प्रयत्नशील राहावे,” अशी प्रतिक्रिया कुलगुरू डॉ. डी. टी. शिर्के यांनी व्यक्त केली.
