मुंबई प्रतिनिधी
मुंबईवर पुन्हा एकदा पावसाचा कहर ओसंडून वाहू लागलाय. रात्रीच्या मुसळधार पावसाने शहराचे जनजीवन अक्षरशः ठप्प केले असून, भारतीय हवामान खात्याने मुंबईसाठी ‘रेड अलर्ट’ जारी केला आहे. अंधेरी ते घाटकोपर पट्ट्यात अवघ्या काही तासांत तब्बल 200 मिमी पाऊस कोसळल्याने उपनगरी रेल्वेचे ट्रॅक पाण्याखाली गेले आहेत.
There are railway tracks here🌊
Scenes from LTT near Kurla. Tracks submerged due to overnight heavy rains #MumbaiRains pic.twitter.com/IK4vEwcNgJ— Mumbai Nowcast (@s_r_khandelwal) August 16, 2025
लोकमान्य टिळक टर्मिनस (LTT) परिसरात मध्य रेल्वेची सेवा ठप्प झाली असून, शेकडो प्रवासी स्थानकांवर अडकले आहेत. कुर्ला आणि सायन परिसरात ट्रॅकवर पाणी साचल्याने अनेक गाड्या रद्द करण्यात आल्या. परिणामी प्रवाशांची प्रचंड गैरसोय झाली असून, रेल्वे प्रशासनाने नागरिकांना घराबाहेर पडण्यापूर्वी हवामान आणि रेल्वे सेवेची माहिती घेण्याचे आवाहन केले आहे.
रस्ते ठप्प, पाण्याचा निचरा मंदावला
मुंबईतील कमी उंचीच्या भागांत पाणी साचल्याने वाहतूक कोंडी झाली आहे. अंधेरी, सायन, कुर्ला, घाटकोपरसह अनेक भागांत रस्त्यांवर कंबरभर पाणी असल्याने वाहनांचा गोंधळ उडाला. महापालिकेच्या पथकांनी पंपिंगची यंत्रणा सुरू केली असली तरी, सततच्या पावसामुळे पाणी उपसा मंदावला आहे. स्थानिकांनी प्रशासनाच्या ढिसाळ नियोजनावर तीव्र नाराजी व्यक्त केली आहे.
शाळा-कार्यालये बंद, नागरिकांची अडचण
शहरातील अनेक शाळा व कार्यालये बंद ठेवण्यात आली आहेत. “रस्त्यांवर इतके पाणी आहे की आम्हाला कुठेही हलता येत नाही,” अशी हतबल प्रतिक्रिया कुर्ल्यातील रहिवाशांनी दिली. व्यावसायिकांना कामावर पोहोचणे कठीण झाले असून, घरी बसूनच काम करण्याचा पर्याय अनेकांनी स्वीकारला आहे.
हवामान खात्याचा इशारा
“मुंबईत दिवसभर अति मुसळधार पाऊस होण्याची शक्यता आहे. नागरिकांनी अत्यावश्यक कारणाशिवाय घराबाहेर पडू नये,”
भारतीय हवामान विभाग
प्रशासनाचे आवाहन
महापालिका आणि हवामान विभागाने नागरिकांना सतर्क राहण्याचे आवाहन केले आहे. आपत्कालीन स्थितीत जवळच्या प्रशासनिक कार्यालयाशी संपर्क साधावा आणि परिस्थिती स्थिर होईपर्यंत सुरक्षित स्थळी थांबावे, असे स्पष्ट करण्यात आले आहे.
मुंबई पुन्हा एकदा पावसाने ठप्प झाली असून, नागरिकांनी ‘सुरक्षितता प्रथम’ हा मंत्र अंगीकारणेच आजचा उपाय ठरत आहे.
