ठाणे प्रतिनिधी
ठाणे : ठाणे शहर गुन्हे शाखेच्या अंमली पदार्थ विरोधी पथकाने उत्तर प्रदेशातून आलेल्या आंतरराज्यीय तस्करावर कारवाई करत तब्बल ३.३९ कोटी रुपयांचा चरस जप्त केला आहे. या प्रकरणात प्रयागराजचा रहिवासी मोहमद मकसुद मोहमद अहमद (वय ४२) या तस्करास अटक करण्यात आली आहे.
पोलीस आयुक्तांच्या विशेष सूचनेनुसार आणि मोहिमेअंतर्गत ही कारवाई ३१ जुलै रोजी रात्री १०.३० वाजता उथळसर नाका परिसरातील सुप्रभ सोसायटीजवळ करण्यात आली. आरोपीकडून ३ किलो ३९० ग्रॅम चरस, रोख रक्कम ₹१,७७०, आधार कार्ड, ड्रायव्हिंग लायसन्स, एक पाकीट व मोठी प्लॅस्टिक पिशवी असा एकूण ₹३,३९,०७,२७०/- किंमतीचा मुद्देमाल जप्त करण्यात आला आहे.
या प्रकरणी राबोडी पोलीस ठाण्यात एनडीपीएस कायद्यान्वये गुन्हा दाखल करण्यात आला असून, आरोपीस ४ ऑगस्टपर्यंत पोलीस कोठडी सुनावण्यात आली आहे.
ही कारवाई अपर पोलीस आयुक्त (गुन्हे) डॉ. पंजाबराव उगले, पोलीस उपायुक्त अमरसिंह जाधव, सहाय्यक आयुक्त विनय घोरपडे यांच्या मार्गदर्शनाखाली वरिष्ठ पोलीस निरीक्षक राहुल मस्के आणि त्यांच्या पथकाने केली.
या पथकामध्ये निलेश मोरे, सोमनाथ पाटील, राजेंद्र निकम, नितीन भोसले, दिपक डुम्मलवाड, हरीष तावडे, अभिजीत मोरे, हेमंत महाले, अमोल देसाई, शिवाजी रावते, शिवाजी वासरवाड, शिल्पा कसबे आणि कोमल लादे यांचा समावेश होता.
ही कारवाई ठाणे शहरात अंमली पदार्थांच्या तस्करीविरोधात पोलिसांनी उचललेले ठोस पाऊल मानले जात आहे.
