रत्नागिरी प्रतिनिधी
रत्नागिरीतील श्री देव गणपतीपुळे मंदिरात आता भाविकांसाठी ड्रेसकोड लागू होणार आहे. गणेशोत्सवापासून ही ड्रेसकोड लागू करण्याचा निर्णय विश्वस्त मंडळाने घेतला आहे. त्यामुळे भाविकांना तोकडे कपडे घालण्यास बंदी राहणार असून मंदिरात येताना संस्कृती जपणारेच कपडे घालावे लागतील.
मंदिरात अनेक वेळा तोकडे कपडे घालून भाविक प्रवेश करतात. त्यामुळे मंदिरात ड्रेसकोड असावी हा मुद्दा गेल्या काही वर्षांत पुढे आला. रत्नागिरी जिह्यातील काही मंदिरांमध्ये ड्रेसकोड लागू करण्यात आली होती. गणपतीपुळे मंदिरात भाविकांसोबत पर्यटकही मोठय़ा संख्येने येतात.
काही प्रमाणात परदेशी पर्यटकही असतात. अशा वेळी तोकडे कपडे किंवा ठिकठिकाणी फाटलेल्या जिन्स पँट घालून पर्यटक आणि भाविक येतात. अशा पर्यटक आणि भाविकांना आता अंगभर कपडे घालावे लागणार आहेत. गणपतीपुळे मंदिरात ड्रेसकोड लागू करण्यासंदर्भात गणपतीपुळे मंदिराची पंच समिती लवकरच एक बैठक आयोजित करणार आहे.
ज्यामध्ये भाविकांना भारतीय संस्कृतीला अनुसरून पेहराव करणे आवश्यक आहे. या निर्णयानुसार, भाविकांना तोकड़े कपडे (छोटे कपडे) परिधान करण्यास मनाई असेल आणि मंदिरामध्ये येताना संस्कृती जपणारे कपडे घालणे आवश्यक आहे .
ड्रेसकोड गणेशोत्सवापासून लागू केला जाण्याची शक्यता आहे, असा निर्णय विश्वस्त मंडळाने घेतला आहे . देवस्थान समितीचे सरपंच डॉ. श्रीराम केळकर यांनी या संदर्भात माहिती दिली आहे.
