पंढरपूर, प्रतिनिधी
पंढरपूर नगरीच्या वेशीवर आषाढी वारीचा सोहळा शिगेला पोहोचला आहे. संतश्रेष्ठ तुकाराम महाराज व संत ज्ञानेश्वर माऊली यांच्या पालख्यांसह राज्याच्या कानाकोपऱ्यातून आलेल्या इतर संतांच्या पालख्या शुक्रवारी (ता. ४ जुलै) वाखरी येथे विसावल्या. शनिवारी (ता. ५ जुलै) या पालख्या पंढरीत प्रवेश करतील आणि रविवारी (ता. ६ जुलै) लाखो भक्तांच्या उपस्थितीत आषाढी एकादशीचा मुख्य वारी सोहळा मोठ्या भक्तिभावात पार पडणार आहे.
वारकऱ्यांच्या मनात उत्साह ओसंडून वाहतोय. ‘विठ्ठलाचे दर्शन कधी घेणार?’ या ओढीने वारकरी भावविभोर झाले असून, पंढरपूर नगरी काहीच अंतरावर असल्याने ‘विठुरायाच्या दर्शनाने आता खरा विसावा मिळेल’ असे भाव त्यांच्या चेहऱ्यावर उमटत आहेत.
गुरुवारी संत ज्ञानेश्वर महाराजांची पालखी भंडीशेगाव येथे, तर संत तुकाराम महाराजांची पालखी पिराची कुरोली येथे मुक्कामी होती. दोन्ही पालख्या शुक्रवारी सायंकाळी वाखरीत दाखल झाल्या. या प्रमुख पालख्यांसोबतच संत निवृत्तिनाथ (पैठण), संत मुक्ताई (मुक्ताईनगर), संत सोपानदेवकाका आणि संत गजानन महाराज यांच्या पालख्याही पंढरीच्या दिशेने मार्गस्थ झाल्या आहेत.
शनिवारी दशमी स्नानाला विशेष धार्मिक महत्त्व असल्याने लाखो भाविक शनिवारीच पंढरीत दाखल होणार आहेत. प्रशासनाने सध्या पंढरपूरमध्ये ४ ते ५ लाखांहून अधिक वारकऱ्यांची उपस्थिती असल्याचा अंदाज व्यक्त केला आहे. सुरक्षेच्या पार्श्वभूमीवर पोलिसांचा चोख बंदोबस्त तैनात करण्यात आला आहे.
वारीच्या निमित्ताने पंढरी नगरी ‘विठ्ठल-विठ्ठल’च्या गजराने दुमदुमली आहे. विठुनामाच्या गजरात एकात्मता, भक्ती, शिस्त, समर्पण आणि अध्यात्म यांचे अद्वितीय दर्शन वारकऱ्यांच्या पावन सोहळ्यात दिसून येत आहे.
वारीच्या लाटा आता पंढरीच्या दारी आल्या आहेत… आणि अवघा महाराष्ट्र ‘पंढरीच्या राणात’ विठुरायाच्या भेटीस उत्सुक आहे!
