ठाकरे घराण्यातील आणखी एक सदस्याची थेट राजकारणात एंट्री
मुंबई – महाराष्ट्र नवनिर्माण सेनेचे अध्यक्ष राज ठाकरे यांचे चिरंजीव अमित ठाकरे हे विधानसभा निवडणूक लढविण्याच्या तयारीत आहेत. मनसेच्या विधानसभा निवडणूक तयारीच्या अनुषंगाने पार पडलेल्या बैठकीत त्यांनी निवडणूक लढविण्याविषयी आग्रही भूमिका मांडली. त्यामुळे आदित्य ठाकरे यांच्यानंतर अमित ठाकरे यांच्या रुपात आणखी एक ठाकरे संसदीय राजकारणात दिसण्याची शक्यता आहे.
मनसेचे नेते आणि सरचिटणीसांची बैठक पक्षाचे मध्यवर्ती कार्यालय राजगड येथे संपन्न झाली. या बैठकीत मनसेची विधानसभा निवडणुकीची तयारी आणि रणनीती, उमेदवारांची निवड आदी मुद्द्यांवर चर्चा झाल्याची माहिती आहे. याच बैठकीत स्वत: निवडणूक लढण्याची इच्छा व्यक्त करतानाच पक्षातील महत्त्वाच्या पदाधिकाऱ्यांनी विधानसभा निवडणूक लढवली पाहिजे, असे मत अमित ठाकरे यांनी मांडले.
आपल्या पक्षातील नेते पदाधिकाऱ्यांनी निवडणुकीला सामोरे गेले पाहिजे. लोकांचे प्रश्न सोडविण्यासाठी संसदीय राजकारणात असणे महत्त्वाचे आहे, असे सांगून स्वत: निवडणुकीला इच्छुक असल्याचे अमित ठाकरे यांनी भर बैठकीत सांगितले. अमित ठाकरे यांच्या घोषणेनंतर ते कोणत्या विधानसभा मतदारसंघातून निवडणूक लढविणार याबद्दलच्या चर्चा सुरू झाल्या आहेत.
अमित ठाकरे गेल्या दोन ते तीन वर्षांपासून सक्रीय राजकारणात आहेत. त्यांच्याकडे महाराष्ट्र नवनिर्माण विद्यार्थी सेनेच्या अध्यक्षपदाची जबाबदारी आहे. यामाध्यमातून त्यांनी विद्यार्थी संघटनेचे जाळे उभे केले आहे. त्याचबरोबर राज्याच्या विविध शहरात सभा संमेलनात उपस्थिती लावून राजकारणात अधिकाधिक पाय रोवत आहेत.
महाराष्ट्रातील काही जिल्ह्यांचा मनसेप्रमुख राज ठाकरे यांनी दौरा केला. या दौऱ्यात राज ठाकरे यांनी विधानसभा निवडणुकीच्या पार्श्वभूमीवर तीन उमेदवारांची घोषणा केली. मुंबईच्या शिवडीमधून पक्षाचे ज्येष्ठ नेते बाळा नांदगावकर, पंढरपूर विधानसभेतून दिलीप धोत्रे तर लातूर ग्रामीणमधून राजू उंबरकर यांच्या उमेदवारीची घोषणा राज यांनी केली आहे.
