नवी मुंबई प्रतिनिधी
नवी मुंबई : पोलीस आयुक्तालयात आगामी काळात मोठ्या प्रशासकीय फेरबदलाचे संकेत मिळत आहेत. महाराष्ट्र पोलीस दलातील पदोन्नती प्रक्रियेअंतर्गत नवी मुंबईतील ११ वरिष्ठ पोलीस निरीक्षकांचा पोलीस उपअधीक्षक तथा सहाय्यक पोलीस आयुक्त (एसीपी) पदाच्या निवडसूचीत समावेश करण्यात आल्याने पोलीस वर्तुळात चर्चेला उधाण आले आहे. या अधिकाऱ्यांना पदोन्नती मिळाल्यास त्यांच्या सध्याच्या पदांवर रिक्त जागा निर्माण होण्याची शक्यता आहे. त्यामुळे शहरातील महत्त्वाच्या पोलीस ठाण्यांच्या नेतृत्वात बदल होण्याची शक्यता व्यक्त केली जात आहे.
रबाळे, रबाळे एमआयडीसी, वाशी, सानपाडा, नेरूळ, एनआरआय सागरी, खारघर, उलवे, खांदेश्वर आणि पनवेल शहर यांसारख्या महत्त्वाच्या पोलीस ठाण्यांसह गुन्हे शाखेतील अधिकाऱ्यांचाही या पदोन्नती प्रक्रियेशी संबंध असल्याने या घडामोडींकडे विशेष लक्ष लागले आहे. मात्र, निवडसूचीत नाव समाविष्ट होणे म्हणजे पदोन्नती निश्चित होणे नव्हे. अंतिम निर्णयापूर्वी संबंधित अधिकाऱ्यांच्या सेवाविषयक नोंदींची पडताळणी केली जाणार आहे.
पदोन्नतीच्या निवडसूचीत कोणत्या अधिकाऱ्यांचा समावेश?
उपलब्ध माहितीनुसार, पदोन्नतीच्या निवडसूचीत समावेश झालेल्या वरिष्ठ पोलीस निरीक्षकांमध्ये रबाळे पोलीस ठाण्याचे बाळकृष्ण साहेबराव सावंत, रबाळे एमआयडीसी पोलीस ठाण्याचे देविदास प्रभाकर काटाळे, वाशी पोलीस ठाण्याचे शशिकांत शिवाजीराव चांदेकर, सानपाडा पोलीस ठाण्याचे दीपक विजय सुर्वे आणि नेरूळ पोलीस ठाण्याचे अजय पांडुरंग कांबळे यांचा समावेश आहे.
याशिवाय एनआरआय सागरी पोलीस ठाण्याचे सुनील आनंदा वाघमारे, उलवे पोलीस ठाण्याचे अर्जुन रामकृष्ण रजाणे, खारघर पोलीस ठाण्याचे संजय वामन जोशी, खांदेश्वर पोलीस ठाण्याच्या स्मिता वाल्मीक ढाकणे, पनवेल शहर पोलीस ठाण्याचे बाळा रघुनाथ कुंभार आणि गुन्हे शाखा, कक्ष क्रमांक तीनमध्ये कार्यरत औदुंबर भालचंद्र पाटील यांची नावेही या यादीत आहेत.
या अधिकाऱ्यांना पदोन्नती मिळाल्यास त्यांच्या सध्याच्या जबाबदाऱ्यांमध्ये बदल होऊ शकतो. परिणामी, संबंधित पोलीस ठाण्यांमध्ये नव्या अधिकाऱ्यांची नियुक्ती करण्याची वेळ प्रशासनावर येण्याची शक्यता आहे.
वाहतूक शाखेतील अधिकाऱ्यांचाही समावेश
या पदोन्नती प्रक्रियेची व्याप्ती केवळ पोलीस ठाण्यांपुरती मर्यादित नसून वाहतूक विभागातील काही अधिकाऱ्यांचाही निवडसूचीत समावेश असल्याचे समोर आले आहे. कोपरखैरणे वाहतूक शाखेचे राजेश रुद्रममी नंदीमठ, खारघर वाहतूक शाखेच्या गुलफरोज मौला आली मुजावर आणि तुर्भे एमआयडीसी वाहतूक शाखेचे अजय पांडुरंग भोसले यांची नावे या यादीत आहेत.
तसेच साईड ब्रँच आणि वाहतूक शाखांमध्ये कार्यरत संतोषकुमार श्रीमंदार काणे, अविनाश एकनाथ काळदाते, तानाजी रामदास भगत, सतीश संभाजीराव कदम, नंदकिशोर मुरलीधर बधे, वैशाली अशोक गलांडे, शत्रुघन देविदास माळी, ब्रह्मानंद रावसाहेब नाईकवाडी, प्रदीप रामनाथजी लांडे, महेशकुमार प्रल्हाद सरतापे आणि तानाजी महादेव नारनवर या अधिकाऱ्यांचाही निवडसूचीत समावेश असल्याची माहिती आहे.
सेवापुस्तिका आणि गोपनीय अहवालांची कसून तपासणी
पदोन्नतीची अंतिम प्रक्रिया पूर्ण करण्यापूर्वी संबंधित अधिकाऱ्यांच्या सेवापुस्तिकेची, गोपनीय अहवालांची आणि अन्य प्रशासकीय नोंदींची पडताळणी केली जाते. प्रलंबित विभागीय चौकशी, कायदेशीर अडचणी किंवा पदोन्नतीच्या पात्रतेवर परिणाम करणाऱ्या बाबींचाही नियमानुसार विचार केला जाऊ शकतो.
ही प्रक्रिया पूर्ण झाल्यानंतरच अंतिम पदोन्नतीबाबत निर्णय घेतला जाणार आहे. त्यामुळे सध्या निवडसूचीत समावेश झालेल्या सर्व अधिकाऱ्यांना पदोन्नती मिळेलच, असे निश्चितपणे सांगता येत नाही. अंतिम यादी जाहीर झाल्यानंतरच पदोन्नतीचे नेमके चित्र स्पष्ट होणार आहे.
पदोन्नतीनंतर महत्त्वाच्या पोलीस ठाण्यांचा कारभार बदलणार?
पदोन्नतीमुळे वरिष्ठ निरीक्षकांच्या सध्याच्या पदांवर रिक्त जागा निर्माण झाल्यास नवी मुंबई पोलीस आयुक्तालयाला नव्या नियुक्त्यांचे नियोजन करावे लागणार आहे. कायदा-सुव्यवस्था, गुन्हेगारी नियंत्रण, वाहतूक व्यवस्थापन आणि वाढत्या नागरी विस्ताराच्या दृष्टीने महत्त्वाच्या असलेल्या पोलीस ठाण्यांमध्ये अनुभवी अधिकाऱ्यांची नियुक्ती करणे प्रशासनासाठी महत्त्वाचे ठरणार आहे.
दरम्यान, काही अधिकारी वैयक्तिक किंवा अन्य कारणांमुळे पदोन्नती स्वीकारण्यास नकार देऊ शकतात, अशी चर्चा पोलीस वर्तुळात आहे. मात्र, पदोन्नती नाकारणाऱ्या अधिकाऱ्यांच्या पुढील नियुक्तीबाबत कोणता निर्णय घेतला जाईल, हे संबंधित सेवा नियम आणि प्रशासकीय आदेशांवर अवलंबून असेल.
पदोन्नती आणि त्यानंतरच्या बदल्यांची प्रक्रिया डिसेंबरपर्यंत पूर्ण होण्याची शक्यता व्यक्त केली जात आहे. त्यामुळे नवी मुंबईचे पोलीस आयुक्त मिलिंद भारंबे यांच्या नेतृत्वाखाली आगामी काळात कोणत्या अधिकाऱ्यांना कोणत्या जबाबदाऱ्या दिल्या जातात, याकडे पोलीस दलाचे लक्ष लागले आहे. अंतिम पदोन्नती यादी आणि नियुक्त्यांचे आदेश जाहीर झाल्यानंतरच संभाव्य खांदेपालटाचे नेमके स्वरूप स्पष्ट होईल.
