छत्रपती संभाजीनगर प्रतिनिधी
छत्रपती संभाजीनगर : डॉ. बाबासाहेब आंबेडकर मराठवाडा विद्यापीठाच्या कुलसचिवपदाची सूत्रे डॉ. संजय साहेबराव कवडे यांनी मंगळवारी, २२ सप्टेंबर रोजी स्वीकारली. पूर्णवेळ कुलसचिवाची नियुक्ती होईपर्यंत ते या पदाचा कार्यवाहक म्हणून कारभार पाहणार आहेत. कुलगुरू डॉ. विजय फुलारी यांनी डॉ. कवडे यांची नियुक्ती केली आहे. विद्यापीठाच्या अधिकृत संकेतस्थळावरही डॉ. संजय कवडे यांचा ‘I/c Registrar’ म्हणून उल्लेख करण्यात आला आहे.
यापूर्वी डॉ. प्रशांत अमृतकर हे कार्यवाहक कुलसचिव म्हणून जबाबदारी सांभाळत होते. पूर्णवेळ कुलसचिवपदासाठी त्यांनी अर्ज केल्यामुळे त्यांनी २१ सप्टेंबर रोजी कार्यवाहक कुलसचिवपदाचा राजीनामा दिला. त्यानंतर रिक्त झालेल्या पदावर आस्थापना विभागाच्या माध्यमातून डॉ. कवडे यांची ‘ऑफिशिएटिंग कुलसचिव’ म्हणून नियुक्ती करण्यात आली. डॉ. अमृतकर यांनी १९ जानेवारी २०२४ ते २१ सप्टेंबर २०२६ या कालावधीत दोन वर्षे आठ महिने कुलसचिवपदाची जबाबदारी सांभाळली.
डॉ. संजय कवडे यांचा विद्यापीठातील प्रशासकीय कामकाजाचा दीर्घ अनुभव आहे. ते गेल्या २१ वर्षांपासून विद्यापीठात कार्यरत असून, या काळात त्यांनी कक्षाधिकारी, सहायक कुलसचिव, उपकुलसचिव तसेच वित्त व लेखाधिकारी अशा विविध जबाबदाऱ्या पार पाडल्या आहेत. वाणिज्यशास्त्र विद्याशाखेत त्यांनी पीएच.डी. प्राप्त केली आहे. त्यामुळे विद्यापीठाच्या प्रशासकीय व्यवस्थेची तसेच विविध विभागांच्या कामकाजाची त्यांना दीर्घ अनुभवातून माहिती आहे.
दरम्यान, विद्यापीठाने पूर्णवेळ कुलसचिव आणि धाराशिव उपपरिसर संचालक या पदांसाठी अर्ज मागविले होते. १५ ऑगस्ट ते १५ सप्टेंबर या कालावधीत कुलसचिवपदासाठी एकूण १८ उमेदवारांनी ऑनलाइन अर्ज दाखल केले आहेत. धाराशिव उपपरिसर संचालक पदासाठी १४ उमेदवारांनी ऑनलाइन अर्ज केले आहेत. या अर्जांच्या ‘हार्ड कॉपी’ जमा करण्याची अंतिम मुदत २३ सप्टेंबर रोजी सायंकाळी ६ वाजेपर्यंत होती. त्यामुळे पुढील निवड प्रक्रियेनंतर पूर्णवेळ कुलसचिवाची नियुक्ती होणार आहे.
डॉ. जयश्री सूर्यवंशी यांनी राजीनामा दिल्यानंतर सप्टेंबर २०२२ पासून विद्यापीठाच्या कुलसचिवपदावर प्रभारी स्वरूपात नियुक्त्या होत आहेत. त्यामुळे आता पूर्णवेळ कुलसचिवाची निवड होईपर्यंत डॉ. संजय कवडे विद्यापीठाच्या प्रशासकीय कामकाजाची जबाबदारी सांभाळणार आहेत. विद्यापीठाच्या अधिकृत संकेतस्थळानुसार, कुलसचिव हे विद्यापीठाचे प्रमुख प्रशासकीय अधिकारी असून ते कुलगुरूंच्या मार्गदर्शनाखाली काम करतात.
