चेन्नई:
तमिळनाडूच्या राजकारणात दशकानुदशके द्रमुक आणि अद्रमुक या दोन पक्षांभोवती फिरणारे सत्तासमीकरण अखेर बदलले असून, अभिनेते आणि ‘तमिळगा वेत्री कळघम’ (TVK) पक्षाचे संस्थापक सी. जोसेफ विजय अर्थात ‘थलपती विजय’ यांनी रविवारी मुख्यमंत्रीपदाची शपथ घेत राज्याच्या राजकीय इतिहासात नवा अध्याय लिहिला. चेन्नईतील जवाहरलाल नेहरू इंदोर स्टेडियम येथे झालेल्या भव्य शपथविधी सोहळ्यात सकाळी दहा वाजता राज्यपाल आर. एन. रवी यांनी विजय यांना पद आणि गोपनीयतेची शपथ दिली. शपथविधीच्या क्षणी उपस्थित जनसमुदायाने घोषणांनी स्टेडियम दणाणून सोडले, तर विजय यांच्या आई-वडिलांच्या डोळ्यांत आनंदाश्रू तरळल्याचे भावनिक दृश्यही पाहायला मिळाले.
#WATCH | Chennai: Tamil Nadu Governor Rajendra Vishwanath Arlekar administered the oath of office to Tamilaga Vettri Kazhagam (TVK) Chief C Joseph Vijay as the Tamil Nadu Chief Minister, at the Jawaharlal Nehru Stadium in Chennai. pic.twitter.com/ZWqm6tu8xH
— ANI (@ANI) May 10, 2026
चित्रपटसृष्टीत सुपरस्टार म्हणून लोकप्रिय असलेल्या विजय यांनी अवघ्या वर्षभरापूर्वी राजकारणात औपचारिक प्रवेश करत ‘तमिळगा वेत्री कळघम’ या पक्षाची स्थापना केली होती. सुरुवातीला त्यांच्या राजकीय प्रयोगाकडे अनेकांनी साशंकतेने पाहिले; मात्र जनसंपर्क मोहिमा, युवकांमध्ये असलेली लोकप्रियता आणि भ्रष्टाचारविरोधी भूमिकेमुळे त्यांनी अल्पावधीतच प्रभावी जनाधार निर्माण केला. विधानसभा निवडणुकीत टीव्हीकेने १०८ जागांवर विजय मिळवत सर्वात मोठा पक्ष म्हणून उदय घेतला आणि तमिळनाडूच्या राजकीय समीकरणांना धक्का दिला.
बहुमतासाठी आवश्यक असलेल्या ११७ आकड्यापर्यंत पोहोचण्यासाठी काँग्रेस, भाकपा, माकपा, व्हीसीके आणि आययुएमएल या पक्षांनी विजय यांना पाठिंबा जाहीर केला. या पाठिंब्यामुळे १२० आमदारांचे संख्याबळ मिळवत विजय यांनी सरकार स्थापनेचा दावा केला होता. राज्यपालांनी त्यांना सरकार स्थापनेसाठी निमंत्रण दिल्यानंतर रविवारी हा बहुचर्चित शपथविधी पार पडला. आता १३ मेपूर्वी त्यांना विधानसभेत बहुमत सिद्ध करावे लागणार आहे.
शपथविधी सोहळ्यासाठी देशभरातील विविध राजकीय नेते आणि चित्रपटसृष्टीतील मान्यवर उपस्थित होते. काँग्रेस नेते Rahul Gandhi हे विशेषतः दिल्लीहून चेन्नईत दाखल झाले होते. विजय यांच्या समर्थकांनी शहरभर मोठे कटआउट्स, पोस्टर्स आणि स्वागत कमानी उभारून उत्सवी वातावरण निर्माण केले होते. अनेक ठिकाणी ढोल-ताशे, फटाके आणि सांस्कृतिक कार्यक्रमांचे आयोजन करण्यात आले होते.
विजय यांच्यासोबत मंत्रिमंडळातील आठ मंत्र्यांनीही शपथ घेतली. त्यामध्ये व्यंकटरमण, राज मोहन, अरुण राज, आनंद, अद्वा अर्जुन, सेंगोट्टय्यान, निर्मल कुमार आणि प्रभू यांचा समावेश आहे. सामाजिक न्याय, पारदर्शक प्रशासन, युवकांना रोजगार आणि शिक्षणव्यवस्थेतील सुधारणा यांना प्राधान्य देण्याचे संकेत नव्या सरकारने दिले आहेत. निवडणूक प्रचारादरम्यान विजय यांनी भ्रष्टाचारमुक्त प्रशासन, शेतकरी हिताचे निर्णय आणि डिजिटल पायाभूत सुविधांवर भर देण्याची भूमिका मांडली होती.
तमिळनाडूच्या राजकारणात हा बदल केवळ सत्तांतर मानला जात नाही, तर पारंपरिक द्रविड राजकारणाला मिळालेले मोठे आव्हान म्हणूनही पाहिले जात आहे. गेल्या सहा दशकांतील राजकीय वर्चस्व मोडीत काढत एका लोकप्रिय अभिनेत्याने थेट मुख्यमंत्रीपदापर्यंत मजल मारल्याने देशभरात या घडामोडीची चर्चा सुरू झाली आहे. आता ‘सुपरस्टार’ची प्रतिमा आणि प्रत्यक्ष प्रशासन यांचा मेळ विजय कितपत घालतात, याकडे संपूर्ण देशाचे लक्ष लागले आहे.
