मुंबई प्रतिनिधी
मुंबईकरांच्या दैनंदिन जीवनवाहिनी असलेल्या लोकल ट्रेन सेवेत मोठा बदल घडणार आहे. मध्य रेल्वेने प्रवाशांच्या दीर्घकालीन मागणीला प्रतिसाद देत 15 डब्यांच्या लोकल ट्रेनची संख्या वाढवण्याचा निर्णय घेतला आहे. यासाठी रेल्वे प्रशासनाने प्लॅटफॉर्म विस्तारीकरणाची मोठी मोहीम हाती घेतली असून, डिसेंबर 2025 पर्यंत 27 स्थानकांवरील काम पूर्ण करण्याचे लक्ष्य ठेवले आहे.
ही योजना पूर्ण झाल्यानंतर प्रवाशांना गर्दीतून दिलासा मिळणार असून, प्रवास अधिक आरामदायी होईल.
प्रवाशांच्या मागणीला रेल्वेचा प्रतिसाद
मध्य रेल्वेच्या स्थानकांवर दररोज लाखो प्रवासी प्रवास करतात. गर्दीच्या वेळेत 12 डब्यांच्या गाड्यांमध्ये प्रवाशांची होणारी कोंडी लक्षात घेता, 15 डब्यांच्या लोकलची मागणी अनेक वर्षांपासून होत होती. अखेर रेल्वे प्रशासनाने या मागणीला सकारात्मक प्रतिसाद दिला आहे.
सूत्रांच्या माहितीनुसार, नव्या 15 डब्यांच्या लोकल गाड्या फास्ट आणि स्लो अशा दोन्ही मार्गिकांवर धावणार आहेत. सुरुवातीला काही 12 डब्यांच्या गाड्यांचे रूपांतर 15 डब्यांमध्ये केले जाईल, आणि पुढे या गाड्यांची संख्या वाढवली जाणार आहे.
• विस्तारीकरण मोहिमेला गती
मध्य रेल्वेच्या मुंबई मंडळातील एकूण 34 स्थानकांपैकी 27 स्थानकांवर प्लॅटफॉर्म विस्तारीकरणाचे काम सुरू आहे. मध्य रेल्वेचे जनसंपर्क अधिकारी स्वप्नील नीला यांनी सांगितले की, “डिसेंबर 2025 पर्यंत 27 स्थानकांचे काम पूर्ण करण्याचा प्रयत्न आहे. या कामानंतर 15 डब्यांच्या लोकल सेवेत दाखल होतील.”
या स्थानकांमध्ये कल्याण–खोपोली आणि कल्याण–कसारा मार्गावरील बहुतांश स्थानकांचा समावेश आहे. त्यामुळे या पट्ट्यातील लांब पल्ल्याच्या प्रवाशांना सर्वाधिक फायदा होणार आहे.
• डिसेंबरपर्यंत विस्तार होणारी स्थानके
विठ्ठलवाडी, उल्हासनगर, कर्जत, खोपोली, अंबरनाथ, आंबिवली, वाशिंद, आसनगाव, आटगाव, शैलू, बदलापूर, भिवपुरी, पळसधरी, मुंब्रा, कळवा, कोपर, ठाकुर्ली, टिटवाळा आणि कसारा.
विस्तारीकरण सुरू असलेली प्रमुख स्थानके: सीएसएमटी (CSMT), ठाणे, कल्याण, डोंबिवली, वांगणी आणि खडावली.
‘नव्या वर्षात वेळापत्रक आणि एसी लोकलची वाढ’
प्लॅटफॉर्म विस्ताराच्या कामामुळे दरवर्षी नोव्हेंबरमध्ये होणारे लोकल वेळापत्रक अपडेट या वर्षी स्थगित ठेवण्यात आले आहे. मात्र, ही कामे पूर्ण झाल्यावर नव्या वर्षात लोकलचे नवे वेळापत्रक जाहीर केले जाईल.
याशिवाय, मध्य रेल्वेच्या ताफ्यात आणखी एसी लोकल दाखल होणार आहेत. सध्या मध्य रेल्वेकडे 6 एसी लोकल असून, त्याद्वारे दररोज सुमारे 80 फेऱ्या घेतल्या जातात. नव्या एसी लोकल्स हार्बर किंवा मेन लाईनवर धावण्याची शक्यता रेल्वे सूत्रांकडून व्यक्त करण्यात आली आहे.
27 स्थानकांचे विस्तारीकरण डिसेंबर 2025 पर्यंत पूर्ण
15 डब्यांच्या लोकल गाड्यांना मिळणार हिरवा कंदील
प्रवाशांना गर्दीतून दिलासा आणि अधिक आरामदायी प्रवास
नव्या वर्षात लोकल वेळापत्रक आणि एसी सेवांमध्ये वाढ
मुंबईकरांसाठी ही केवळ रेल्वे सुधारणा नाही, तर रोजच्या प्रवासातला “दिलासा एक्सप्रेस” ठरण्याची आशा आहे.
