हवेली प्रतिनिधी
लोकसेवा प्रतिष्ठानच्या फुलगाव (ता. हवेली) येथील नेताजी सुभाषचंद्र बोस सैनिकी शाळेला मंत्री शिवेंद्रसिंहराजे भोसले यांनी नुकतीच भेट दिली. विद्यार्थ्यांकडून झालेल्या सैनिकी मानवंदनेचा स्वीकार करून त्यांनी शालेय उपक्रमांचा आढावा घेतला.
या वेळी विद्यार्थ्यांनी शंखनाद, मर्दानी खेळांचे प्रात्यक्षिक तसेच पारंपरिक स्वागत करून पाहुण्यांचे मन जिंकले. लोकसेवा इंग्रजी माध्यम शाळेतील विद्यार्थ्यांनी रांगोळीच्या माध्यमातून काढलेली शिवेंद्रसिंहराजेंची सहा फूट बाय सहा फूट प्रतिकृती विशेष आकर्षण ठरली. शालेय प्रांगणातील आर्ट गॅलरीलाही त्यांनी भेट देत विद्यार्थ्यांच्या कलाकृतींचे कौतुक केले.
कार्यक्रमाला लोकसेवा शैक्षणिक संकुलाचे संस्थापक अध्यक्ष दीपक पायगुडे, जिल्हा बँकेचे संचालक प्रदीप कंद, उद्योजक प्रशांत तळेकर, संस्थेचे कोषाध्यक्ष प्रशांत जोशी, विश्वस्त बाळासाहेब चांदेकर, युवराज पाटील, पंकज जगताप, राहुल वागसकर आदी मान्यवर उपस्थित होते. तसेच प्राचार्य अमर क्षीरसागर, उपप्राचार्य विकास तिरखुंडे, प्रशासन अधिकारी पांडुरंग जगताप, अश्वदल प्रमुख युवराज राठोड आणि मर्दानी खेळ प्रशिक्षक अशोक पवार हेही यावेळी उपस्थित होते.
यानंतर शिवेंद्रसिंहराजे यांनी संस्थेच्या ‘ईश्वरपुरम्’ या भारताच्या पूर्वांचलातील विद्यार्थ्यांसाठी उभारण्यात येत असलेल्या वसतिगृह प्रकल्पाला भेट दिली. संस्थेचे अध्यक्ष विनीत कुबेर आणि संदीप पूरकर यांनी या ठिकाणच्या बांधकामाची माहिती दिली.
