मुंबई, सातारा प्रतिनिधी न्युज नेटवर्क
भारतरत्न डॉ. बाबासाहेब आंबेडकर यांच्या महापरिनिर्वाण दिनानिमित्त मुंबईतील शिवाजी पार्क येथे मोठ्या संख्येने येणाऱ्या आंबेडकर अनुयायींची संख्या लक्षात घेता त्यांची गैरसोय टाळण्यासाठी तयारी
पूर्ण करण्यात आली आहे. या उपाययोजनेंतर्गत शुक्रवार 6 डिसेंबर रोजी स्थानिक सुट्टी जाहीर करण्यात आली आहे.
मुंबई – मुंबईतील शिवाजी पार्क येथे चैत्यभूमी असून या ठिकाणी महापरिनिर्वाण दिनी मोठ्या संख्येने आंबेडकर अनुयायी दरवर्षी येत असतात. या वर्षी देखील मोठ्या संख्येने भीम अनुयायी मुंबईत येणार आहेत. त्यामुळे त्यांची गैरसोय होऊ नये यासाठी तयारी पूर्ण करण्यात आली आहे. महापरिनिर्वाण दिनानिमित्त केलेल्या सोयीसुविधांचा आढावा काळजीवाहू मुख्यमंत्री एकनाथ शिंदे यांनी मंगळवारी व्हिडीओ कॉन्फरन्सिंगद्वारे घेतला आहे. या सोबतच हेलिकॉप्टरमधून चैत्यभूमीवर पुष्पवृष्टी करण्याचे नियोजन देखील करण्यात आले आहे. नागरिकांच्या सोईसाठी रेल्वे स्थानक, बस स्थानके या ठिकाणी मदत कक्ष उभारण्यात येणार आहे.
मुंबईकरांना सुट्टी जाहीर
मुंबईत मोठ्या प्रमाणात नागरिक येणार असल्याने त्यांची गैरसोय होऊ नये या साठी मुंबईकरांना शुक्रवारी महापरिनिर्वाण दिनानिमित्त स्थानिक सुट्टी जाहीर करण्यात आली आहे.
डॉ. बाबासाहेब आंबेडकर यांच्या महापरिनिर्वाण दिनानिमित्त अनुयायांसाठी ४ ते ७ डिसेंबर दरम्यान बेस्टने विशेष बसफेऱ्यांचे नियोजन केले आहे. दादर रेल्वे स्थानकापासून चैत्यभूमीपर्यंत दर १५ ते २० मिनिटांनी बस सोडण्यात येणार आहे.
डॉ. बाबासाहेब आंबेडकर यांच्या महापरिनिर्वाण दिनानिमित्त गुरुवारी मध्यरात्री विशेष लोकल धावणार आहेत. यात परळ-कल्याण व कुर्ला-पनवेल स्थानकांदरम्यान १२ लोकल चालवल्या जाणार आहेत. या गाड्यांना सर्व स्थानकांवर थांबे देण्यात आले आहेत.
मध्य रेल्वेवरील कुर्ला-परळ विशेष लोकल कुर्ला येथून रात्री १२.४५ वाजता सुटेल. ही लोकल परळ येथे रात्री १.०५ वाजता पोहचेल.
कल्याण-परळ लोकल कल्याण येथून रात्री १ वाजता सुटेल. परळ येथे रात्री २.१५ ला पोहोचेल.
ठाणे-परळ विशेष लोकल ठाणे येथून रात्री २.१० ला सुटेल. तर ही लोकल परळ येथे रात्री २.५५ ला पोहोचेल.
परळ-ठाणे लोकल परळ येथून रात्री १.१५ ला सुटेल व ठाणे येथे रात्री १.५५ ला पोहोचेल.
परळ-कल्याण विशेष लोकल परळ येथून रात्री २.२५ ला सुटेल तर कल्याण येथे रात्री ३.४० ला पोहोचेल.
हार्बर मार्गावरील वाशी-कुर्ला विशेष लोकल वाशी येथून रात्री १.३० वाजता सुटेल व कुर्ला येथे रात्री २.१० ला पोहोचेल.
पनवेल-कुर्ला विशेष लोकल पनवेल येथून रात्री १.४० ला व कुर्ला येथे रात्री २.४५ ला पोहोचेल.
वाशी-कुर्ला विशेष लोकल वाशी येथून रात्री ३.१० वाजता सुटेल व कुर्ला येथे रात्री ३.४०ला पोहोचेल.
कुर्ता-वाशी विशेष लोकल कुर्ला येथून रात्री २.३० ला सुटेल व वाशी येथे रात्री ३ ला पोहोचेल.
