अहिल्यानगर प्रतिनिधी
अहिल्यानगर जिल्ह्याचे भूमिपुत्र मराठा बटालियनमधील शूर जवान संदीप पांडुरंग गायकर यांना जम्मू-काश्मीरमध्ये दहशतवाद्यांविरोधात लढताना शहीद झाले.
त्यांच्या शौर्यपूर्ण बलिदानामुळे संपूर्ण अकोले तालुका आणि अहिल्यानगर जिल्हा शोकसागरात बुडाला आहे. आज ब्राह्मणवाडा गावात शहीद संदीप गायकर यांच्यावर लष्करी इतमामात अंत्यसंस्कार करण्यात आले. या वेळी त्यांना शेवटची मानवंदना देण्यासाठी गावकऱ्यांसह परिसरातील हजारो नागरिक उपस्थित होते. तर शहीद संदीप गायकरांना त्यांच्या पत्नीने आपल्या दीड वर्षाच्या मुलाला कडेवर घेऊन अखेरचा ‘सॅल्युट’ दिला. यावेळी हजारो नागरिकांच्या अश्रूंचा बांध फुटल्याचे पाहायला मिळाले.
अहिल्यानगर जिल्ह्याच्या अकोले तालुक्यातील ब्राम्हणवाडा गावचे संदीप पांडुरंग गायकर मागील सहा ते सात वर्षांपासून भारतीय सैन्याच्या मराठा बटालियनमध्ये कार्यरत होते. गुरुवारी पहाटे जम्मू-काश्मीरमधील किश्तवाड सेक्टरमध्ये सीमेवर कर्तव्य बजावत असताना त्यांच्या दहा जवानांच्या तुकडीवर दहशतवाद्यांनी गोळीबार केला. या हल्ल्यात देशासाठी शौर्याने लढताना संदीप गायकर यांनी आपल्या प्राणांची आहुती दिली. संदीप गायकर हे अत्यंत शिस्तबद्ध, कर्तव्यनिष्ठ आणि राष्ट्रप्रेमी सैनिक म्हणून ओळखले जात होते. त्यांनी सैन्यात निष्ठा, प्रामाणिकपणा आणि धैर्याने सेवा बजावत देशाच्या रक्षणासाठी अखेरच्या श्वासापर्यंत लढा दिला. त्यांच्या पश्चात आई-वडील, पत्नी आणि एक मुलगी असा परिवार आहे. त्यांच्या वीरमरणाची बातमी गावात पोहोचताच वातावरण शोकमग्न झाले. शहीद संदीप गायकर यांचे पार्थिव 23 मे रोजी त्यांच्या मूळगावी, अकोले तालुक्यातील ब्राम्हणवाडा येथे आणण्यात आले होते, जिथे संपूर्ण गावाने त्यांना श्रद्धांजली अर्पण केली.
शहीद संदीप गायकरांच्या पत्नीचा नवऱ्याला अखेरचा ‘सॅल्युट’
त्यांचे पार्थिव गावात पोहोचल्यानंतर सर्वप्रथम संपूर्ण ग्रामप्रदक्षिणा करण्यात आली. संदीप गायकर यांनी शिक्षण घेतलेल्या सह्याद्री विद्यालयाच्या प्रांगणात त्यांच्या अंत्यसंस्काराची व्यवस्था करण्यात आली होती. त्यांच्यावर लष्करी इतमामात अंत्यसंस्कार करण्यात आले. शहीद जवानाला अखेरचा निरोप देण्यासाठी नागरिकांनी मोठ्या संख्येने उपस्थिती लावली होती.
‘शहीद संदीप गायकर अमर रहे’ च्या जयघोषांनी संपूर्ण परिसर दुमदुमून गेला. सैन्यदल आणि अहिल्यानगर पोलीस दलाच्या वतीने त्यांना लष्करी मानवंदना देण्यात आली. यावेळी मानवंदना सुरू असताना समोर पतीचं पार्थिव चितेवर आणि कडेवर दीड वर्षाचा मुलगा, अशा परिस्थितीत पत्नी दीपाली हिने आपल्या नवऱ्याला सैनिक मानवंदना सुरू असताना अखेरचा सॅल्युट दिला. हे दृश्य पाहून अनेकांना अश्रू अनावर झाले होते.
