डोंबिवली प्रतिनिधी
जुनी डोंबिवली परिसरात एका साध्या इंग्रजी शब्दावरून मराठी-उत्तर भारतीय वादाला चिघळण्याची घटना समोर आली आहे. ‘Excuse me’ असं बोलल्याने महिला आणि तिच्या कुटुंबियांना भर रस्त्यात मारहाण केल्याचा व्हिडिओ सध्या सोशल मीडियावर चांगलाच व्हायरल झाला आहे. त्यामुळे मराठी आणि हिंदी भाषीकांमध्ये वाद होण्याची शक्यता आहे.
विष्णूनगर पोलिसांनी याप्रकरणी तक्रारी नोंदवत तीन जणांविरोधात अदखलपात्र गुन्हा दाखल केला असून अधिक तपास सुरू केला आहे. या घटनेमुळे डोंबिवलीतील भाषिक तणाव पुन्हा एकदा चव्हाट्यावर आला आहे.
7 एप्रिल 2025 रोजी रात्री साडेनऊच्या सुमारास गणेश श्रद्धा बिल्डिंगमध्ये राहणाऱ्या पुनम अंकीत गुप्ता त्यांच्या दोन मैत्रिणींसोबत घराकडे परतत होत्या. त्याचदरम्यान, बिल्डिंगच्या बाहेर रस्त्यावर काही लोक उभे होते. त्या लोकांना वाट करून देण्यासाठी पुनम यांनी ‘Excuse me’ असे इंग्रजीत म्हटले. मात्र, या साध्या वाक्यावरून तिथे उभे असलेल्या अनिल पवार, त्यांची पत्नी आणि बाबासाहेब गोविंद बाले यांचा संताप अनावर झाला.
या तिघांनी ‘इंग्रजी नको, मराठीत बोला’ असे म्हणत पुनम आणि त्यांच्या मैत्रिणीला चापट्या आणि लाथाबुक्क्यांनी बेदम मारहाण केली. एवढ्यावरच न थांबता, गोंधळ ऐकून मदतीला आलेले पुनम यांचे पती आणि दुसरी मैत्रीण यांनाही मारहाण करण्यात आली. या मारहाणीत पुनम यांच्या नाकातील फुलीसुद्धा तुटली असून, त्यांचे शारीरिक आणि मानसिक नुकसान झाले आहे.
या प्रकाराचा व्हिडिओ घटनास्थळी उपस्थित असलेल्या इतरांनी काढून सोशल मीडियावर पोस्ट केला असून, त्याला प्रचंड प्रतिसाद मिळत आहे. या घटनेनंतर दोन्ही गटांनी विष्णूनगर पोलिस ठाण्यात परस्परविरोधी तक्रारी दाखल केल्या आहेत. पोलिसांनी भारतीय दंड विधानाच्या कलम 115(2), 352 आणि 324(4) अंतर्गत अदखलपात्र गुन्हा नोंदवून तपास सुरू केला आहे.
या घटनेमुळे डोंबिवलीत मराठी आणि उत्तर भारतीय समाजांमधील तणाव पुन्हा एकदा समोर आला असून, स्थानिक राजकीय वर्तुळातूनही तीव्र प्रतिक्रिया येण्याची शक्यता आहे. पीडित महिलांनी या घटनेतील आरोपींवर कठोर कारवाई करण्याची मागणी केली आहे.
