मुंबई प्रतिनिधी
मुंबई : दिवंगत उपमुख्यमंत्री अजित पवार यांच्या पुतळ्याच्या अनावरणावरून महाराष्ट्रातील राजकीय वातावरण चांगलेच तापले आहे. केंद्रीय गृहमंत्री अमित शाह यांच्या हस्ते पुणे जिल्हा परिषद परिसरात अजित पवार यांच्या अर्धाकृती पुतळ्याचे अनावरण करण्यात आले. यावेळी अमित शाह यांनी अजितदादांच्या कार्याचे आणि त्यांच्या मैत्रीचे भरभरून कौतुक केले. मात्र, याच कार्यक्रमावरून शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी भाजपवर जोरदार हल्लाबोल केला आहे. अजित पवार हयात असताना त्यांच्यावर गंभीर आरोप करणाऱ्या अमित शाह यांनी आता पुतळ्याचे अनावरण करण्यापूर्वी अजितदादांची माफी मागायला हवी होती. त्यांनी दादांच्या पुतळ्यासमोर नाक घासून माफी मागावी, अशा सणसणीत शब्दांत उद्धव ठाकरे यांनी शाह यांना लक्ष्य केले.
अजित पवार यांच्या निधनानंतर त्यांच्या राजकीय कारकिर्दीतील संघर्ष आणि भाजपसोबतच्या बदललेल्या संबंधांवरून पुन्हा एकदा राजकीय चर्चा सुरू झाली आहे. पुण्यातील पुतळा अनावरण कार्यक्रमाला अमित शाह यांच्यासह मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार, तसेच राष्ट्रवादी काँग्रेसचे ज्येष्ठ नेते आणि पदाधिकारी उपस्थित होते. या कार्यक्रमात अमित शाह यांनी अजित पवार यांना आपला जवळचा मित्र संबोधत त्यांच्या अचानक जाण्याने महाराष्ट्राचे मोठे नुकसान झाल्याची भावना व्यक्त केली.
मात्र, अमित शाह यांच्या या कौतुकावर उद्धव ठाकरे यांनी आक्षेप घेतला. अजित पवार यांच्यावर ७० हजार कोटी रुपयांच्या सिंचन घोटाळ्याचे आरोप करत भाजपने त्यांना भ्रष्टाचाराच्या मुद्द्यावरून लक्ष्य केले होते. त्यावेळी भाजपच्या नेत्यांनी अजितदादांची राजकीय कोंडी केली. त्यांच्या प्रतिमेवर प्रश्नचिन्ह निर्माण केले. आता मात्र त्याच अजित पवारांच्या पुतळ्याचे अनावरण करताना मैत्रीचे गोडवे गायले जात आहेत. ही भूमिका राजकीय दुटप्पीपणाची असल्याचा आरोप ठाकरेंनी केला.
अजितदादा जिवंत असताना त्यांच्यावर आरोप करायचे आणि आता त्यांच्या पुतळ्याचे अनावरण करताना मैत्रीचे दाखले द्यायचे, हा कोणता राजकीय व्यवहार? असा सवाल उपस्थित करत ठाकरेंनी भाजपच्या भूमिकेवर प्रश्नचिन्ह उपस्थित केले. पुतळ्याचे अनावरण करण्यापूर्वी अमित शाह यांनी अजितदादांची माफी मागायला हवी होती, अशी आक्रमक भूमिका त्यांनी मांडली.
संजय राऊतांचाही भाजपवर निशाणा; ईडी-सीबीआयचा दबाव असल्याचा आरोप
दरम्यान, शिवसेना ठाकरे गटाचे खासदार संजय राऊत यांनीही या कार्यक्रमावरून भाजपला लक्ष्य केले. अजित पवार यांच्यावर एकेकाळी भ्रष्टाचाराचे आरोप करणारे भाजपचे नेते आज त्यांच्याच कार्याचे कौतुक करत आहेत. ही महाराष्ट्राच्या राजकारणातील मोठी विसंगती असल्याचे राऊत म्हणाले.
अजित पवार यांनी शरद पवार यांची साथ सोडून महायुतीत प्रवेश करण्यामागे ईडी आणि सीबीआयसारख्या तपास यंत्रणांचा दबाव होता, असा गंभीर दावाही राऊत यांनी केला. राजकीय परिस्थितीचा फायदा घेत विरोधकांना तपास यंत्रणांच्या माध्यमातून अडचणीत आणले जाते आणि त्यातून राजकीय समीकरणे बदलली जातात, असा आरोप त्यांनी केला.
अजितदादांच्या विमान अपघाताच्या तपासावरूनही प्रश्न
अजित पवार यांच्या २८ जानेवारी २०२६ रोजी बारामतीजवळ झालेल्या विमान अपघातातील मृत्यूचा मुद्दाही या राजकीय वादाच्या केंद्रस्थानी आला आहे. या अपघाताच्या तपासाबाबत संजय राऊत यांनी पुन्हा प्रश्न उपस्थित केले. अजित पवार यांच्याशी एवढी जवळची मैत्री असल्याचा दावा केला जात असेल, तर त्यांच्या मृत्यूच्या प्रकरणात अद्याप गुन्हा का दाखल झालेला नाही, असा सवाल त्यांनी उपस्थित केला.
या प्रकरणात केवळ राजकीय विधाने करून चालणार नाही, तर तपासातील पारदर्शकता आणि जबाबदारी निश्चित झाली पाहिजे, अशी विरोधकांची भूमिका आहे.
दरम्यान, १६ नोव्हेंबर रोजी पुण्यात झालेल्या पुतळा अनावरण कार्यक्रमात मुख्यमंत्री देवेंद्र फडणवीस यांनीही विमान अपघाताच्या तपासाचा मुद्दा उपस्थित केला. तपास लवकर पूर्ण करून निष्कर्ष जाहीर करण्यासाठी आपण अमित शाह यांना विनंती केली असून त्यांनी याबाबत लक्ष घालण्याचे आश्वासन दिल्याचे फडणवीस यांनी सांगितले. विमान अपघाताची चौकशी एएआयबीकडून सुरू असून अंतिम अहवाल अद्याप प्रलंबित आहे.
एकीकडे अमित शाह अजित पवार यांना जवळचा मित्र आणि महाराष्ट्राच्या विकासातील महत्त्वाचा नेता म्हणून गौरवत आहेत, तर दुसरीकडे उद्धव ठाकरे आणि संजय राऊत त्यांच्या जुन्या राजकीय संघर्षाची आठवण करून देत भाजपला जाब विचारत आहेत. त्यामुळे अजितदादांच्या पुतळ्याचे अनावरण हा केवळ स्मृतिसोहळा न राहता महाराष्ट्रातील सत्ताकारण, तपास यंत्रणांचा वापर आणि राजकीय सोयीच्या मैत्रीवरून नव्या संघर्षाचा विषय बनला आहे.
अजितदादांच्या आठवणींना अभिवादन करताना राजकीय नेत्यांच्या जुन्या भूमिका आणि आजची वक्तव्ये यांची तुलना होत असून, या वादाचे पडसाद आगामी राजकीय घडामोडींमध्येही उमटण्याची शक्यता आहे.


