मुंबई प्रतिनिधी
मुंबई : महाराष्ट्रात एकाच वेळी अनेक जिल्ह्यांतील न्यायालयांना बॉम्बने उडवून देण्याच्या धमक्या मिळाल्याने राज्याच्या सुरक्षा यंत्रणेत मोठी खळबळ उडाली आहे. ठाणे, सातारा, बीड, सोलापूर, सांगली, पंढरपूर, हिंगोली, अहिल्यानगर आणि परभणी येथील न्यायालयांना धमकीचे ई-मेल किंवा संदेश प्राप्त झाल्याची माहिती समोर आली आहे. या गंभीर प्रकारामुळे न्यायालयीन कामकाजावर परिणाम झाला असून, खबरदारीचा उपाय म्हणून अनेक न्यायालयीन इमारती तातडीने रिकाम्या करण्यात आल्या. न्यायाधीश, वकील, न्यायालयीन कर्मचारी आणि पक्षकारांना सुरक्षितस्थळी हलविण्यात आले आहे.
धमकीचे संदेश प्राप्त होताच पोलीस प्रशासनाने युद्धपातळीवर हालचाली सुरू केल्या. बॉम्ब शोधक व नाशक पथके, श्वानपथके आणि स्थानिक पोलिसांनी न्यायालयांच्या इमारतींची कसून तपासणी सुरू केली. काही ठिकाणी वरिष्ठ पोलीस अधिकारीही घटनास्थळी दाखल झाले. संभाव्य धोका लक्षात घेऊन अग्निशमन दल आणि वैद्यकीय यंत्रणांनाही सतर्क ठेवण्यात आले आहे. विशेष म्हणजे, महाराष्ट्रातील विविध जिल्ह्यांमध्ये जवळपास एकाच वेळी अशा प्रकारचे धमकीचे संदेश मिळाल्याने यामागे एकच सूत्रधार आहे की वेगवेगळ्या व्यक्तींचा सहभाग आहे, याबाबत तपास यंत्रणांसमोर प्रश्न निर्माण झाला आहे.
सातारा न्यायालयाची इमारत रिकामी; पोलिसांचा कडेकोट बंदोबस्त
सातारा जिल्हा न्यायालयाला अज्ञात ई-मेल पत्त्यावरून बॉम्बसदृश वस्तू असल्याचा धमकीचा संदेश प्राप्त झाला. ही माहिती मिळताच पोलीस प्रशासनाने तातडीने संपूर्ण न्यायालयीन इमारत रिकामी केली. न्यायाधीश, वकील, कर्मचारी आणि पक्षकारांना इमारतीबाहेर काढण्यात आले. त्यानंतर बॉम्ब शोधक व नाशक पथक, डॉग स्क्वॉड आणि क्यूआरटी पथक घटनास्थळी दाखल झाले.
न्यायालयातील दालने, कार्यालये, परिसर आणि अन्य ठिकाणांची कसून तपासणी करण्यात येत आहे. आपत्कालीन परिस्थितीचा सामना करण्यासाठी अग्निशमन दल आणि वैद्यकीय यंत्रणेलाही सज्ज ठेवण्यात आले. आतापर्यंतच्या तपासात कोणतीही संशयास्पद वस्तू आढळलेली नसल्याची माहिती आहे. नागरिकांनी घाबरून न जाता अफवांवर विश्वास ठेवू नये, असे आवाहन पोलीस अधीक्षक निखिल पिंगळे यांनी केले आहे.
ठाणे न्यायालयात सुरक्षा यंत्रणा अलर्ट
ठाणे जिल्हा न्यायालयाला बॉम्बस्फोटाची धमकी मिळाल्यानंतर पोलिसांनी तातडीने सुरक्षेच्या उपाययोजना सुरू केल्या. न्यायालय परिसरात मोठा पोलीस बंदोबस्त तैनात करण्यात आला असून, संपूर्ण इमारतीची तपासणी सुरू आहे. धमकीचा संदेश कोणी आणि कोणत्या माध्यमातून पाठवला, याचा शोध घेतला जात आहे.
बीड, अहिल्यानगरमध्येही बॉम्बचा शोध
सातारा आणि ठाण्यानंतर बीड जिल्हा न्यायालयालाही अशाच स्वरूपाचा धमकीचा ई-मेल प्राप्त झाल्याची माहिती समोर आली. ई-मेल मिळताच पोलिसांच्या पथकांनी न्यायालय परिसराची तपासणी सुरू केली. वरिष्ठ पोलीस अधिकारी घटनास्थळी दाखल झाले असून, सायबर पोलिसांकडून ई-मेलचा स्रोत शोधण्याचे काम सुरू आहे.
धमकीच्या संदेशात कितपत तथ्य आहे, याची पडताळणी केली जात आहे. न्यायालयाचे कामकाज लवकरात लवकर पूर्ववत सुरू करण्यासाठी प्रशासन प्रयत्नशील आहे. दरम्यान, अहिल्यानगर जिल्हा न्यायालयालाही बॉम्बने उडवून देण्याची धमकी ई-मेलद्वारे मिळाल्याने तेथील सुरक्षा यंत्रणाही सतर्क झाली आहे.
सांगली, सोलापूर, पंढरपूरमध्ये खळबळ
सांगली आणि सोलापूर जिल्हा न्यायालयांनाही बॉम्बस्फोटाच्या धमकीचे ई-मेल मिळाल्याची माहिती आहे. पंढरपूर न्यायालयालाही अशाच प्रकारचा धमकीचा संदेश प्राप्त झाल्याने संबंधित परिसरात एकच खळबळ उडाली. खबरदारी म्हणून न्यायालयातील अधिकारी, कर्मचारी, वकील आणि नागरिकांना बाहेर काढण्यात आले. बॉम्ब शोधक पथकांनी न्यायालयीन इमारतींची तपासणी सुरू केली. धमकीमागील नेमका उद्देश काय, याचा तपास पोलिसांकडून केला जात आहे.
परभणी, हिंगोलीतही पोलिसांची धावपळ
परभणी जिल्हा न्यायालयालाही धमकीचा ई-मेल मिळाल्याची माहिती समोर आली आहे. त्यानंतर डॉग स्क्वॉड आणि बॉम्ब शोधक व नाशक पथकासह पोलिसांची विविध पथके घटनास्थळी दाखल झाली. न्यायालय परिसराची कसून तपासणी करण्यात येत आहे.
हिंगोली जिल्हा व सत्र न्यायालयालाही बॉम्बने उडवून देण्याचा धमकीचा संदेश मिळाल्याने पोलीस आणि प्रशासकीय यंत्रणेची धावपळ उडाली. जिल्हा पोलीस दलाच्या बॉम्ब शोधक पथकाने तातडीने न्यायालयात धाव घेतली. न्यायाधीशांच्या दालनांसह संपूर्ण न्यायालयीन इमारतीची तपासणी करण्यात आली.
धमक्यांमागे एकच सूत्रधार? सायबर पोलिसांकडून तपास
राज्यातील विविध न्यायालयांना मिळालेल्या धमकीच्या संदेशांमागे एकच व्यक्ती किंवा संघटना कार्यरत आहे का, याचा तपास आता महत्त्वाचा ठरणार आहे. धमकीचे ई-मेल कोणत्या ठिकाणाहून पाठवण्यात आले, त्यासाठी कोणते डिजिटल माध्यम वापरण्यात आले आणि या प्रकारामागे नेमका काय उद्देश आहे, याचा शोध पोलीस आणि सायबर यंत्रणा घेत आहेत.
न्यायालये ही न्यायव्यवस्थेची महत्त्वाची केंद्रे असल्याने अशा प्रकारच्या धमक्यांकडे अत्यंत गांभीर्याने पाहिले जात आहे. धमकी खोटी ठरली तरी न्यायालयीन व्यवस्थेत भीतीचे वातावरण निर्माण करणे, कामकाज विस्कळीत करणे आणि नागरिकांमध्ये दहशत पसरवणे हा गंभीर प्रकार आहे. त्यामुळे धमकी देणाऱ्यांचा शोध घेऊन त्यांच्यावर कठोर कारवाई करण्याचे आव्हान पोलिसांसमोर आहे. तपास पूर्ण होईपर्यंत नागरिकांनी अफवांवर विश्वास ठेवू नये आणि पोलीस प्रशासनाला सहकार्य करावे, असे आवाहन करण्यात आले आहे.
