मुंबई : प्रतिनिधी
मुंबई : वांद्रे पूर्व येथील प्रज्ञा सांस्कृतिक केंद्र, त्रिरत्न बुद्ध विहार यांच्या वतीने आयोजित वर्षावास कार्यक्रमाची धार्मिक वातावरणात सांगता झाली. या निमित्ताने तथागत गौतम बुद्ध, धम्म आणि संघाप्रती कृतज्ञता व्यक्त करत पूज्य भिक्खू संघाला भोजनदान व चिवरदान अर्पण करण्यात आले. या कार्यक्रमाला बौद्ध समाजातील उपासक-उपासिका उपस्थित होते.
बौद्ध धम्मपरंपरेत वर्षावासाला विशेष महत्त्व आहे. वर्षावासाच्या काळात भिक्खू संघाकडून धम्माचे अध्ययन, चिंतन, मनन आणि साधना केली जाते. तसेच उपासक-उपासिकांना धम्माचे विचार समजून घेण्याची आणि धार्मिक उपक्रमांत सहभागी होण्याची संधी मिळते. याच पार्श्वभूमीवर प्रज्ञा सांस्कृतिक केंद्र, त्रिरत्न बुद्ध विहार यांच्या पुढाकाराने वर्षावास कार्यक्रमाचे आयोजन करण्यात आले होते.
कार्यक्रमाच्या सांगता सोहळ्यात पूज्य भिक्खू संघाला श्रद्धापूर्वक भोजनदान देण्यात आले. तसेच चिवरदानाचा धार्मिक उपक्रमही पार पडला. उपस्थित बौद्ध उपासकांनी भिक्खू संघाला चिवरदान व भोजनदान अर्पण करून तथागतांच्या धम्माप्रती आपली श्रद्धा आणि कृतज्ञता व्यक्त केली.
या वेळी भिक्खू संघाच्या वतीने उपस्थित उपासक-उपासिकांना धम्मदेसना देण्यात आली. बौद्ध धम्मातील विचार, पंचशीलाचे महत्त्व, धम्माचरण आणि दैनंदिन जीवनात धम्ममूल्यांचे पालन करण्याची आवश्यकता याविषयी मार्गदर्शन करण्यात आले. केवळ धार्मिक विधींपुरते मर्यादित न राहता आपल्या आचरणातून भगवान बुद्धांनी दिलेल्या शिकवणुकीचे पालन करावे, असा संदेश देण्यात आला.
संस्थेचे अध्यक्ष सुरेश गायकवाड यांच्या अध्यक्षतेखाली हा वर्षावास सांगता सोहळा संपन्न झाला. भोजनदान, चिवरदान आणि भिक्खू संघाच्या धम्मदेसनेमुळे विहार परिसरात मंगलमय व धम्ममय वातावरण निर्माण झाले होते.
