सिंधुदुर्ग प्रतिनिधी
सिंधुदुर्ग जिल्ह्यातील कुडाळ तालुक्यात महाविद्यालयीन तरुणीची धारदार शस्त्राने वार करून निर्घृण हत्या करण्यात आल्याची धक्कादायक घटना समोर आली आहे. दामिनी किरण पालव (वय २३, रा. वर्दे, खालची पालववाडी) असे मृत तरुणीचे नाव आहे. शनिवारी (दि. १७ ऑक्टोबर) सायंकाळी वर्दे-कडावल मुख्य रस्त्यालगत असलेल्या ओढ्याजवळ ही घटना घडली. या प्रकरणातील संशयित साहिल विश्राम धुरी याला पोलिसांनी मध्यरात्री चारच्या सुमारास त्याच्या घरातून अटक केली. प्राथमिक माहितीनुसार, एकतर्फी प्रेमातून हा खून झाल्याचा संशय व्यक्त केला जात आहे. या घटनेमुळे वर्दे परिसरासह संपूर्ण सिंधुदुर्ग जिल्ह्यात खळबळ उडाली आहे.
कॉलेजवरून घरी परतताना हल्ला
दामिनी ही कुडाळ तालुक्यातील एका महाविद्यालयात हॉटेल मॅनेजमेंटचे शिक्षण घेत होती. शनिवारी सायंकाळी पावणेपाचच्या सुमारास ती महाविद्यालयातून घरी परतली होती. कॉलेजचा गणवेश परिधान करून वर्दे-कडावल रस्त्यावरून ती आपल्या घराकडे जात असताना रस्त्यापासून सुमारे ७० मीटर अंतरावरील ओढ्याजवळ तिच्यावर हल्ला करण्यात आला.
सायंकाळी पावणेसहा ते सहाच्या दरम्यान हल्लेखोराने दामिनीवर धारदार शस्त्राने वार केले. या हल्ल्यात ती गंभीर जखमी झाली. हल्ल्यानंतर आरोपी घटनास्थळावरून पसार झाला. भर सायंकाळी आणि वर्दळीच्या रस्त्याजवळ घडलेल्या या घटनेमुळे परिसरातील नागरिकांमध्ये भीतीचे वातावरण निर्माण झाले आहे.
झटापटीचा आवाज ऐकताच ग्रामस्थांची धाव
घटनेच्या वेळी मुख्य रस्त्यावर मोबाईलवर बोलत असलेल्या एका स्थानिक तरुणाला ओढ्याच्या दिशेने झटापट आणि ओरडण्याचा आवाज ऐकू आला. त्याने तातडीने रस्त्यावरून जाणाऱ्या ग्रामस्थांना याबाबत माहिती दिली. त्यानंतर ग्रामस्थांनी आवाजाच्या दिशेने धाव घेतली असता दामिनी रक्ताच्या थारोळ्यात पडलेली दिसून आली.
घटनेची माहिती मिळताच वर्देचे सरपंच आणि पोलीस पाटील यांनी घटनास्थळी धाव घेतली. त्यांनी तातडीने पोलिसांना घटनेची माहिती दिली. पोलिसांनी घटनास्थळी पोहोचून पाहणी केली आणि तपासाला सुरुवात केली. तरुणीवर झालेल्या हल्ल्याचे गांभीर्य लक्षात घेऊन संशयिताचा शोध घेण्यासाठी पोलिसांनी तपासाची चक्रे वेगाने फिरवली.
काळा शर्ट घातलेला तरुण दुचाकीवरून पसार
हल्ल्यानंतर काळा शर्ट घातलेला एक तरुण दुचाकीवरून वेगाने घटनास्थळावरून निघून गेल्याचे काहींनी पाहिले होते. या माहितीच्या आधारे पोलिसांनी संशयिताचा शोध सुरू केला. परिसरातील सीसीटीव्ही फुटेज आणि अन्य उपलब्ध माहितीच्या आधारे तपास करण्यात आला.
तपासादरम्यान साहिल विश्राम धुरी याचे नाव समोर आले. संशयित साहिल हा दामिनीच्या महाविद्यालयातच शिकत असल्याची माहिती पुढे आली आहे. त्यानंतर पोलिसांनी त्याच्या हालचालींचा माग काढत शोधमोहीम तीव्र केली.
मध्यरात्री चार वाजता घरातून अटक
या प्रकरणाचा तपास करताना पोलिसांनी संशयित साहिल धुरी याला मध्यरात्री चारच्या सुमारास त्याच्या घरातून अटक केली. घटनेनंतर काही तासांतच संशयिताला ताब्यात घेण्यात आल्याने तपासाला महत्त्वाची दिशा मिळाली आहे.
प्राथमिक माहितीनुसार, दामिनीच्या हत्येमागे एकतर्फी प्रेमसंबंध किंवा प्रेमप्रकरण असण्याची शक्यता व्यक्त केली जात आहे. मात्र, हत्येमागील नेमके कारण अद्याप स्पष्ट झालेले नाही. दामिनी आणि संशयित यांच्यात नेमका काय वाद होता, हल्ल्यापूर्वी काही घडले होते का आणि हत्या करण्यामागील कारण काय, या सर्व बाबींचा तपास पोलीस करत आहेत.
हत्येच्या घटनेने जिल्ह्यात खळबळ
शिक्षण घेऊन भविष्य घडविण्याच्या वयात दामिनीचा अशा प्रकारे मृत्यू झाल्याने वर्दे परिसरात हळहळ व्यक्त होत आहे. या घटनेमुळे तरुणींच्या सुरक्षिततेचा प्रश्न पुन्हा एकदा चर्चेत आला आहे. निर्जन ठिकाणी तरुणीवर झालेल्या हल्ल्याचे गांभीर्य लक्षात घेता, पोलिसांकडून घटनास्थळावरील पुरावे आणि उपलब्ध माहितीच्या आधारे तपास सुरू आहे.
संशयित साहिल धुरी याच्या अटकेनंतर आता या हत्येमागील नेमके कारण काय, गुन्ह्यात कोणत्या शस्त्राचा वापर करण्यात आला आणि हल्ल्यापूर्वी नेमका काय घटनाक्रम घडला, याचा उलगडा होण्याची अपेक्षा आहे. या प्रकरणाचा पुढील तपास सिंधुदुर्ग पोलीस करत आहेत.
