मुंबई प्रतिनिधी
दिल्लीतील जंतरमंतर येथे सुरू असलेल्या आंदोलनाच्या पार्श्वभूमीवर महाराष्ट्रातही राजकीय वातावरण तापले असून, येत्या २६ जुलै रोजी मुंबईत ठाकरे बंधूंच्या नेतृत्वाखाली संयुक्त मोर्चा काढण्यात येणार आहे. या मोर्चात कोणत्याही प्रकारचा गोंधळ किंवा अनुचित प्रकार खपवून घेतला जाणार नाही, असा स्पष्ट इशारा मनसे अध्यक्ष राज ठाकरे यांनी दिला. दिल्लीतील आंदोलनासारखा प्रकार मुंबईतील मोर्चात घडविण्याचा कोणी प्रयत्न केला, तर आमचे कार्यकर्ते त्यांना सोडणार नाहीत, असे राज ठाकरे यांनी ठणकावून सांगितले.
राज ठाकरे आणि शिवसेना (ठाकरे गट) पक्षप्रमुख उद्धव ठाकरे यांनी पत्रकार परिषद घेत २६ जुलै रोजी मुंबईत संयुक्त आंदोलनाची घोषणा केली. या वेळी दोन्ही नेत्यांनी केंद्र सरकारच्या भूमिकेवर जोरदार टीका केली. विद्यार्थ्यांच्या प्रश्नांकडे गांभीर्याने पाहण्याची गरज असून, आंदोलन चिघळण्याऐवजी सरकारने आंदोलकांशी संवाद साधावा, अशी मागणीही त्यांनी केली.
‘आंदोलनात असामाजिक तत्त्वे घुसवण्याचा प्रयत्न झाल्यास खपवून घेणार नाही’
दिल्लीतील जंतरमंतरवरील आंदोलनाच्या आडून काही असामाजिक तत्त्वे पोलिसांवर हल्ला करण्याचा प्रयत्न करत असून, आंदोलन भडकवण्याचे प्रयत्न होत असल्याचा आरोप राज ठाकरे यांनी केला. अशा प्रकारचे कोणतेही प्रयत्न मुंबईतील मोर्चात होऊ नयेत, याची काळजी घेतली जाईल, असे त्यांनी स्पष्ट केले.
‘२६ तारखेला आमच्या मोर्चात असे कोणी घुसवण्याचा प्रयत्न केला, तर त्यांना फटकावून काढू. आमचा मोर्चा पूर्णपणे शांततेत होईल. कोणताही गोंधळ होणार नाही. मात्र, दिल्लीसारखा प्रकार करण्याचा प्रयत्न झाला तर आमचे लोक त्यांना सोडणार नाहीत,’ असा इशारा राज ठाकरे यांनी दिला.
मुंबईतील आंदोलनाला कोणतेही हिंसक वळण लागू नये, यासाठी आयोजकांकडून विशेष खबरदारी घेतली जाईल, असेही त्यांनी स्पष्ट केले.
‘आग भडकवू नका; विद्यार्थ्यांशी चर्चा करा’
उद्धव ठाकरे यांनीही केंद्र सरकारच्या कार्यपद्धतीवर जोरदार टीका केली. देशातील विद्यार्थी आणि तरुण आता भीतीच्या पलीकडे गेले आहेत. त्यांच्या मनातील अस्वस्थता सरकारने समजून घेण्याची गरज आहे, असे ते म्हणाले.
‘काल मी काही विद्यार्थ्यांना भेटलो. आंदोलनादरम्यान “मारो, मारो” अशी घोषणा देणारा मुलगा नागपूरचा आहे. त्याचीही मी भेट घेतली. तो म्हणाला, मारून मारून काय करणार? असं जगून काय फायदा? मुलं आता भीतीच्या पलीकडे गेली आहेत. त्यांची मनस्थिती सरकारने समजून घेतली पाहिजे. त्यांच्या कपड्यांची तपासणी करून प्रश्न सुटणार नाहीत,’ असे उद्धव ठाकरे यांनी सांगितले.
सरकारने आंदोलन दडपण्याऐवजी विद्यार्थ्यांशी संवाद साधावा. परिस्थिती अधिक चिघळेल, अशी कोणतीही कृती सरकारने करू नये, असे आवाहनही त्यांनी केले.
‘सरकारला संवेदना नाहीत’
यावेळी उद्धव ठाकरे यांनी यापूर्वी झालेल्या आंदोलनांचा संदर्भ देत सरकारच्या भूमिकेवर प्रश्नचिन्ह उपस्थित केले. ‘२०१८ मध्ये जी. डी. अग्रवाल नावाचे गृहस्थ उपोषणाला बसले होते. त्यांचा मृत्यू झाला. गंगा प्रदूषणाचा प्रश्न कायम राहिला. सरकार इतके निर्दयी कसे होऊ शकते?’ असा सवाल त्यांनी केला.
सोमन वांगचुक यांच्याशी आपण यापूर्वी चर्चा केली होती. उपोषण सोडण्याचा सल्लाही दिला होता. मात्र, सरकारकडे संवेदनशीलता नसल्याची टीका उद्धव ठाकरे यांनी केली.
‘सरकारने आंदोलकांशी चर्चा करावी. जबाबदार व्यक्तींवर कारवाई करायची असेल तर ती करा. मात्र, विद्यार्थ्यांमध्ये आणि तरुणांमध्ये असंतोषाची आग भडकवू नका. शांतता भंग होईल, अशी परिस्थिती निर्माण करण्याचे काम सरकारने करू नये,’ असा इशारा त्यांनी दिला.
‘आंदोलन घराघरात पोहोचले म्हणून सरकार बॅकफूटवर’
आंदोलन सुरू झाल्यानंतरच सरकारकडून चर्चेची तयारी दाखवली जात असल्याचा आरोप राज ठाकरे यांनी केला. सरकारने सुरुवातीपासूनच विद्यार्थ्यांशी चर्चा केली असती, तर परिस्थिती इतकी चिघळली नसती, असे ते म्हणाले.
‘चर्चा आधीच व्हायला हवी होती. सुरुवातीलाच संवाद साधला असता, तर ही परिस्थिती निर्माण झाली नसती. आता आंदोलन घराघरात पोहोचले आहे. त्यामुळे सरकार बॅकफूटवर गेले आहे,’ असे राज ठाकरे म्हणाले.
शेतकरी आंदोलनाचा दाखला देत त्यांनी केंद्र सरकारच्या भूमिकेवरही टीका केली. ‘शेतकरी आंदोलनाच्या वेळी सरकारने आंदोलकांना चर्चेसाठी का बोलावले नाही? कारण ते आंदोलन त्यावेळी घराघरात पोहोचले नव्हते. आता मात्र आंदोलनाची व्याप्ती वाढल्याचे सरकारच्या लक्षात आले आहे. त्यामुळे सारवासारव सुरू आहे,’ असा आरोप त्यांनी केला.
‘हा मतपेटीचा विषय नाही, न्यायाचा प्रश्न’
विद्यार्थ्यांच्या आंदोलनाला राजकीय रंग देण्याचा प्रयत्न केला जात असल्याचे सांगत उद्धव ठाकरे यांनी हा प्रश्न कोणत्याही राजकीय पक्षाच्या मतपेटीपुरता मर्यादित नसल्याचे स्पष्ट केले.
‘हा विषय मतपेटीचा नाही, तर न्यायाचा आहे. विद्यार्थी आत्महत्या करत आहेत. त्यांच्या भविष्याचा प्रश्न आहे. मग इथे मतपेटीचा विषय येतो कुठे? देशातील विविध राज्यांमधून सत्तेच्या कार्यपद्धतीविरोधात असंतोष व्यक्त होत आहे. ही बाब सरकारने गांभीर्याने समजून घेतली पाहिजे,’ असे उद्धव ठाकरे म्हणाले.
सरकारच्या धोरणांवर किंवा कारभारावर टीका करणाऱ्यांना थेट राष्ट्रविरोधी ठरवले जात असल्याची टीकाही त्यांनी केली.
‘तुमच्या विरोधात कोणी बोलले की त्याला देशद्रोही किंवा राष्ट्रविरोधी ठरवले जाते. लोकशाहीमध्ये प्रश्न विचारण्याचा आणि सरकारच्या विरोधात भूमिका मांडण्याचा अधिकार प्रत्येकाला आहे,’ असे राज ठाकरे यांनी स्पष्ट केले.
२६ जुलैला मुंबईत शक्तिप्रदर्शन
दरम्यान, २६ जुलै रोजी मुंबईत होणाऱ्या संयुक्त मोर्चाच्या माध्यमातून ठाकरे बंधू एकत्रितपणे शक्तिप्रदर्शन करणार आहेत. दिल्लीतील आंदोलन, विद्यार्थ्यांवरील कारवाई आणि केंद्र सरकारच्या भूमिकेविरोधात हा मोर्चा काढण्यात येणार असल्याचे सांगण्यात आले.
या मोर्चात मोठ्या संख्येने नागरिक, विद्यार्थी आणि कार्यकर्ते सहभागी होण्याची शक्यता आहे. मोर्चा शांततेत पार पडेल, असा दावा ठाकरे बंधूंनी केला असला तरी, दिल्लीतील घटनांच्या पार्श्वभूमीवर मुंबईतील आंदोलनाकडे राज्याचे लक्ष लागले आहे.
दरम्यान, ‘मुंबईतील मोर्चात कोणी जाणीवपूर्वक गोंधळ घालण्याचा किंवा दिल्लीसारखी परिस्थिती निर्माण करण्याचा प्रयत्न केला, तर त्याला आमचे कार्यकर्ते सोडणार नाहीत,’ असा इशारा राज ठाकरे यांनी पुन्हा एकदा दिल्याने २६ जुलैच्या आंदोलनाच्या पार्श्वभूमीवर राजकीय वातावरण आणखी तापण्याची शक्यता आहे.
