मुंबई प्रतिनिधी
मुंबई आणि उपनगरांमध्ये सुरू असलेल्या मुसळधार पावसामुळे जनजीवन विस्कळीत झाले असून नागरिकांच्या सुरक्षेच्या दृष्टीने राज्य प्रशासनाने महत्त्वाचे पाऊल उचलले आहे. महाराष्ट्र राज्य आपत्ती व्यवस्थापन प्राधिकरणाने (एसडीएमए) अत्यावश्यक सेवा वगळता शासकीय आणि निमशासकीय कार्यालयांना अर्ध्या दिवसाची सुटी जाहीर केली आहे. त्याचबरोबर खासगी कंपन्या, उद्योग आणि कार्यालयांनी कर्मचाऱ्यांना शक्य तेथे ‘वर्क फ्रॉम होम’ची सुविधा उपलब्ध करून द्यावी, असे निर्देश देण्यात आले आहेत.
गेल्या काही दिवसांपासून सुरू असलेल्या संततधार पावसामुळे शहरातील अनेक सखल भाग जलमय झाले आहेत. रस्त्यांवर पाणी साचल्याने वाहतुकीचा वेग मंदावला असून उपनगरी रेल्वे सेवांवरही परिणाम झाला आहे. काही ठिकाणी वाहतूक कोंडी, झाडे कोसळणे आणि पाणी तुंबल्याच्या घटनांमुळे नागरिकांना मोठ्या अडचणींचा सामना करावा लागत आहे.
या पार्श्वभूमीवर भारतीय हवामान विभागाने मुंबईसाठी ‘रेड अलर्ट’ जारी केला असून पुढील काही तासांतही अतिमुसळधार पावसाची शक्यता व्यक्त केली आहे. ही परिस्थिती लक्षात घेऊन राज्य आपत्ती व्यवस्थापन प्राधिकरणाने नागरिकांनी अत्यावश्यक कामाशिवाय घराबाहेर पडणे टाळावे, असे आवाहन केले आहे.
खासगी कंपन्या आणि आस्थापनांनी स्थानिक परिस्थितीचा आढावा घेऊन कर्मचाऱ्यांच्या सुरक्षिततेला प्राधान्य द्यावे आणि शक्य असल्यास घरातून काम करण्यास परवानगी द्यावी, असेही प्राधिकरणाने स्पष्ट केले आहे. मात्र, आरोग्य सेवा, आपत्कालीन यंत्रणा, पोलीस, अग्निशमन दल, सार्वजनिक वाहतूक आणि इतर अत्यावश्यक सेवांचे कामकाज नेहमीप्रमाणे सुरू राहणार असल्याचे प्रशासनाने स्पष्ट केले.
दरम्यान, सोशल मीडियावर फिरणाऱ्या अफवांवर विश्वास न ठेवता केवळ शासकीय यंत्रणा आणि अधिकृत माध्यमांकडून जारी करण्यात येणाऱ्या सूचनांचेच पालन करावे, असे आवाहन प्रशासनाने नागरिकांना केले आहे. पावसाचा जोर कायम राहण्याची शक्यता लक्षात घेता सर्व संबंधित यंत्रणा सतर्क असून परिस्थितीवर सातत्याने लक्ष ठेवण्यात येत आहे.
