मुंबई प्रतिनिधी
राज्यात गेल्या काही दिवसांपासून सुरू असलेल्या मुसळधार पावसाने जनजीवन विस्कळीत केले असले, तरी मुंबईकरांसाठी मात्र दिलासादायक बातमी समोर आली आहे. मुंबईसह उपनगरांमध्ये संततधार पाऊस सुरू असल्याने शहरातील अनेक सखल भागांमध्ये पाणी साचले असून नदी-नाले दुथडी भरून वाहत आहेत. दुसरीकडे, मुंबईला पाणीपुरवठा करणाऱ्या धरणांमधील पाणीसाठ्यातही लक्षणीय वाढ होत असल्याने यंदाच्या पाणीटंचाईची चिंता बऱ्याच प्रमाणात कमी होण्याची चिन्हे दिसू लागली आहेत.
या पार्श्वभूमीवर मुंबईतील महत्त्वाचा पवई तलाव आज (२ जुलै) पहाटे सुमारे ५.३० वाजता पूर्ण क्षमतेने भरून वाहू लागला. बृहन्मुंबई महानगरपालिकेने (बीएमसी) याबाबत अधिकृत माहिती दिली आहे. सुमारे ५४५ कोटी लिटर जलधारण क्षमता असलेल्या पवई तलावातील पाणी प्रामुख्याने औद्योगिक वापरासाठी राखीव असले, तरी तलाव ओव्हरफ्लो झाल्याने शहरातील जलस्रोतांमध्ये मोठी भर पडल्याचे मानले जात आहे.
दरम्यान, मुंबईला पाणीपुरवठा करणाऱ्या सात प्रमुख जलाशयांमधील पाणीसाठ्यातही सातत्याने वाढ होत आहे. बीएमसीने प्रसिद्ध केलेल्या ताज्या आकडेवारीनुसार, मोडक सागर धरणातील पाणीसाठा १८ टक्क्यांवरून २० टक्क्यांपर्यंत वाढला आहे. तानसा धरणातील साठा एकूण क्षमतेच्या २.७२ टक्क्यांवर पोहोचला असून मिडल वैतरणा धरणात १,९३,५३० दशलक्ष लिटर क्षमतेपैकी ११.७१ टक्के पाणीसाठा उपलब्ध झाला आहे.
याशिवाय विहार तलावातील पाणीसाठ्याने ५० टक्क्यांचा टप्पा ओलांडला असून तुळशी तलावातही साठा सुमारे २८ टक्क्यांवर पोहोचला आहे. मात्र, भातसा धरणातील पाणीसाठा अद्याप ५ टक्क्यांपेक्षा कमी असून अप्पर वैतरणा जलाशयातही अपेक्षित प्रमाणात पाणी साचलेले नाही. तरीही सातही जलाशयांतील एकूण पाणीसाठा वाढून तो १,०३,८७१ दशलक्ष लिटरपर्यंत पोहोचल्याने आगामी काळात मुंबईच्या पाणीपुरवठ्याबाबत सकारात्मक चित्र निर्माण झाले आहे.
दरम्यान, कोकणातही पावसाचा जोर कायम आहे. रायगड जिल्ह्यातील पोलादपूर आणि महाबळेश्वर परिसरात गेल्या काही दिवसांपासून मुसळधार पाऊस सुरू असून गेल्या २४ तासांत पोलादपूरमध्ये तब्बल १३० मिमी पावसाची नोंद झाली आहे. यंदाच्या पावसाळ्यात दुसऱ्यांदा १०० मिमीपेक्षा अधिक पाऊस पडल्याची नोंद झाली असून ३० जूनपर्यंत वार्षिक सरासरीच्या सुमारे ४० टक्के पावसाची नोंद या भागात झाली आहे.
या मुसळधार पावसाचा परिणाम म्हणून सावित्री नदीवरील एमआयडीसीच्या मालकीचे रानबाजीरे धरण पूर्ण क्षमतेने भरून ओव्हरफ्लो झाले असून धरणातून नियंत्रित पाण्याचा विसर्ग सुरू करण्यात आला आहे. पोलादपूर तालुक्यातील चोळई, कामथी, ढवली आणि घोडवनी नद्यांचे पाणी सावित्री नदीला मिळते. महाबळेश्वर आणि प्रतापगड परिसरातील डोंगररांगांमध्ये पडणारा मुसळधार पाऊस घोडवनी नदीमार्गे सावित्री नदीत येत असल्याने नदीच्या पाणीपातळीत झपाट्याने वाढ झाली आहे.
हवामान विभागाने पुढील काही दिवस मुंबई, कोकण आणि घाटमाथ्यावर जोरदार ते अतिजोरदार पावसाचा इशारा दिला असून नागरिकांनी सतर्क राहण्याचे आवाहन प्रशासनाने केले आहे. तसेच नदीकाठच्या भागातील नागरिकांनी आणि पर्यटकांनी अनावश्यकपणे पाण्याजवळ जाणे टाळावे, असेही प्रशासनाने स्पष्ट केले आहे.
