मुंबई प्रतिनिधी
राज्य विधिमंडळाच्या हिवाळी अधिवेशनाच्या पहिल्याच दिवशी सत्ताधारी आणि विरोधकांमध्ये जोरदार शाब्दिक चकमक उडाल्याचे पाहायला मिळाले. अलीकडेच राज्याच्या राजकारणात चर्चेचा विषय ठरलेल्या ‘ऑपरेशन टायगर’च्या पार्श्वभूमीवर शिवसेना (ठाकरे गट) आणि शिवसेना (शिंदे गट) यांच्यातील राजकीय संघर्ष अधिक तीव्र झाल्याचे चित्र सभागृहात दिसून आले. लक्षवेधी सूचनांवरील चर्चेदरम्यान ठाकरे गटाचे आमदार आदित्य ठाकरे यांनी उपमुख्यमंत्री एकनाथ शिंदे यांच्यावर थेट निशाणा साधत टीकेची झोड उठवली. त्यानंतर शिंदे यांनीही आक्रमक प्रत्युत्तर देत विरोधकांवर पलटवार केला.
सभागृहात लक्षवेधी सूचनांवरील प्रश्नांना संबंधित मंत्र्यांकडून थेट उत्तरे दिली जात नसल्याचा मुद्दा उपस्थित करत आदित्य ठाकरे यांनी सरकारवर टीका केली. काही महत्त्वाच्या विभागांची जबाबदारी स्वतःकडे ठेवूनही त्या विभागांशी संबंधित प्रश्नांची उत्तरे इतर मंत्र्यांकडून दिली जात असल्याबद्दल त्यांनी नाराजी व्यक्त केली. “ज्या खात्यांसाठी आग्रह धरून जबाबदारी घेतली, त्या खात्यांबाबत सभागृहात स्वतः उत्तर द्यायला हवे. मंत्र्यांना उत्तरे देता येत नसतील तर तसे स्पष्ट सांगावे,” अशी टीका त्यांनी केली.
आदित्य ठाकरे यांच्या या वक्तव्यामुळे सभागृहातील वातावरण तापले. त्यावर उपमुख्यमंत्री एकनाथ शिंदे यांनी तत्काळ उत्तर देत विरोधकांच्या भूमिकेवर प्रश्नचिन्ह उपस्थित केले. विरोधकांकडे आता सरकारविरोधात ठोस मुद्दे उरले नसून अलीकडील राजकीय घडामोडींच्या धक्क्यातून ते अद्याप सावरलेले नाहीत, असा टोला त्यांनी लगावला.
“कालच त्यांना मोठा राजकीय धक्का बसला आहे. त्यामुळे त्यांची मानसिक अवस्था अस्वस्थ झाली असून पुढील काळात असे आणखी धक्के बसणार आहेत,” असे म्हणत शिंदे यांनी विरोधकांवर निशाणा साधला. त्यांच्या या वक्तव्यानंतर सत्ताधारी आणि विरोधी बाकांमधून जोरदार घोषणाबाजी सुरू झाली.
सभागृहाच्या कामकाजावर प्रश्न उपस्थित करणाऱ्या विरोधकांनाही शिंदे यांनी फटकारले. अध्यक्षांच्या कार्यपद्धतीवर टीका करणे योग्य नसल्याचे सांगताना त्यांनी सभागृहातील सर्व कामकाज नियमांच्या चौकटीतच सुरू असल्याचा दावा केला. “अध्यक्षांनी विरोधकांना आपली भूमिका मांडण्यासाठी पुरेशी संधी दिली आहे. मात्र प्रश्नांची उत्तरे ऐकून घेण्याऐवजी गोंधळ घालणे आणि राजकीय स्टंटबाजी करणे, एवढाच विरोधकांचा कार्यक्रम राहिला आहे,” अशी टीका त्यांनी केली.
याचबरोबर विरोधकांच्या सभागृहातील उपस्थितीवरही शिंदे यांनी प्रश्न उपस्थित केले. “सरकारला प्रश्न विचारायचे आणि उत्तराची वेळ आली की सभागृहाबाहेर निघून जायचे, ही विरोधकांची जुनी पद्धत आहे. प्रश्न विचारून उत्तर ऐकण्याची तयारी नसलेल्यांनी आम्हाला संसदीय परंपरांचे धडे देऊ नयेत,” असा टोला त्यांनी लगावला.
दरम्यान, ‘ऑपरेशन टायगर’नंतर शिवसेनेतील राजकीय संघर्ष अधिक तीव्र झाल्याचे संकेत या वादातून पुन्हा एकदा मिळाले. अधिवेशनाच्या पहिल्याच दिवशी झालेल्या या शाब्दिक संघर्षामुळे आगामी दिवसांमध्ये सभागृहात सत्ताधारी आणि विरोधकांमध्ये आणखी आक्रमक राजकीय सामना रंगण्याची शक्यता व्यक्त केली जात आहे.
