पुणे प्रतिनिधी
सर्वसामान्य नागरिकांना अत्याधुनिक आणि परवडणाऱ्या आरोग्य सुविधा उपलब्ध करून देण्याच्या दिशेने पुण्यात एक महत्त्वपूर्ण पाऊल उचलण्यात आले आहे. पुणे महानगरपालिका आणि आपुलकी हेल्थकेअर यांच्या संयुक्त विद्यमाने सार्वजनिक-खाजगी भागीदारीतून उभारण्यात आलेल्या अत्याधुनिक कर्करोग रुग्णालयाचे मुख्यमंत्री देवेंद्र फडणवीस यांच्या हस्ते लोकार्पण करण्यात आले. सामाजिक बांधिलकी जपत उभारण्यात आलेले हे केंद्र आरोग्य क्षेत्रासाठी प्रेरणादायी ठरणार असून, राज्यातील कर्करोग उपचार व्यवस्थेला नवे बळ देणारे ठरेल, असा विश्वास मुख्यमंत्र्यांनी व्यक्त केला.
या लोकार्पण सोहळ्याला उपमुख्यमंत्री सुनेत्रा पवार, उच्च व तंत्रशिक्षण मंत्री चंद्रकांत पाटील, महापौर मंजुषा नागपुरे, खासदार मेधा कुलकर्णी, आमदार भीमराव तापकीर, आमदार राहुल कुल, उपमहापौर परशुराम वाडेकर, महानगरपालिका आयुक्त नवलकिशोर राम तसेच वैद्यकीय क्षेत्रातील मान्यवर उपस्थित होते.
‘वेळेत निदान झाले तर कर्करोग पूर्णपणे बरा होऊ शकतो’
कार्यक्रमात बोलताना मुख्यमंत्री फडणवीस म्हणाले की, राज्यात आणि देशात कर्करोगाचे प्रमाण झपाट्याने वाढत आहे. अनेकदा रुग्णांना उशिरा निदान झाल्यामुळे उपचार प्रक्रिया अधिक गुंतागुंतीची आणि खर्चिक बनते. मात्र वेळेत निदान आणि योग्य उपचार मिळाल्यास कर्करोग पूर्णपणे बरा होऊ शकतो. हीच बाब लक्षात घेऊन केंद्र आणि राज्य शासनाने विविध आरोग्य योजनांमध्ये कर्करोग उपचारांचा समावेश केला आहे.
ते पुढे म्हणाले की, गरीब आणि मध्यमवर्गीय नागरिकांना अत्याधुनिक उपचार आर्थिक अडचणींशिवाय मिळावेत, यासाठी शासन सातत्याने प्रयत्नशील आहे. आरोग्य सेवा अधिक सक्षम आणि सर्वसमावेशक करण्यासाठी सार्वजनिक-खाजगी भागीदारीची संकल्पना भविष्यात अधिक महत्त्वाची ठरणार आहे.
राज्यात उभारले जाणार ‘कर्करोग ग्रीड’
मुख्यमंत्र्यांनी यावेळी राज्य शासनाच्या ‘कर्करोग ग्रीड’ संकल्पनेची माहिती देताना सांगितले की, महाराष्ट्रात मोठ्या प्रमाणावर कर्करोग उपचार केंद्रांचे जाळे निर्माण करण्यात येत आहे. या ग्रीडच्या माध्यमातून ग्रामीण आणि शहरी भागातील रुग्णांना एकाच दर्जाच्या उपचार सुविधा उपलब्ध होतील. निदान, उपचार, तज्ज्ञ डॉक्टरांचे मार्गदर्शन आणि वैद्यकीय यंत्रणांमध्ये समन्वय निर्माण करण्यासाठी हे ग्रीड महत्त्वपूर्ण ठरणार आहे.
राज्यातील जिल्हा रुग्णालये, वैद्यकीय महाविद्यालये आणि खासगी आरोग्य संस्था यांना या यंत्रणेशी जोडण्याचा प्रयत्न सुरू असल्याचेही त्यांनी नमूद केले.
‘आपुलकी’च्या उपक्रमाचे कौतुक
पुणे महानगरपालिका आणि आपुलकी फाउंडेशनच्या माध्यमातून उभारण्यात आलेल्या या प्रकल्पाचे मुख्यमंत्री फडणवीस यांनी विशेष कौतुक केले. सामाजिक उत्तरदायित्व जपत नागरिकांसाठी आधुनिक आरोग्य सुविधा उभारण्याचा हा आदर्श उपक्रम असल्याचे त्यांनी सांगितले.
रुग्णालयात कर्करोग निदानासाठी अत्याधुनिक उपकरणे, केमोथेरपी विभाग, प्रगत रेडिएशन सुविधा, तज्ज्ञ डॉक्टरांची टीम तसेच रुग्ण आणि नातेवाईकांसाठी आवश्यक सुविधा उपलब्ध करून देण्यात आल्या आहेत. त्यामुळे पुणे आणि आसपासच्या जिल्ह्यांतील रुग्णांना मोठा दिलासा मिळणार आहे.
मुख्यमंत्र्यांकडून रुग्णालयाची पाहणी
लोकार्पणानंतर मुख्यमंत्री फडणवीस यांनी रुग्णालयातील विविध विभागांची पाहणी केली. यावेळी त्यांनी वैद्यकीय उपकरणे, उपचार सुविधा, रुग्ण कक्ष आणि आरोग्य सेवा व्यवस्थेची माहिती घेतली. रुग्णांना सन्मानपूर्वक आणि जलद सेवा देण्यावर भर देण्याच्या सूचनाही त्यांनी प्रशासनाला दिल्या.
कार्यक्रमास पुणे महानगरपालिकेचे पदाधिकारी, आपुलकी फाउंडेशनचे सदस्य, वैद्यकीय अधिकारी, आरोग्य कर्मचारी तसेच मोठ्या संख्येने नागरिक उपस्थित होते.
