अंबरनाथ / नांदेड / अहिल्यानगर प्रतिनिधी
राज्यातील २३ नगरपरिषद व नगरपंचायतींसाठी आज मतदान प्रक्रिया सुरू असताना विविध ठिकाणी गोंधळ, आरोप-प्रत्यारोप आणि तणावाच्या घटना समोर आल्या. सकाळी साडेसात ते सायंकाळी साडेपाच या वेळेत मतदान होत असतानाच अंबरनाथमध्ये बोगस मतदारांचा आरोप, कोपरगावमध्ये उमेदवारांमध्ये बाचाबाची, तर नांदेडमध्ये मतदारांना कोंडून ठेवल्याच्या गंभीर आरोपामुळे राजकीय वातावरण तापले आहे.
अंबरनाथ : ‘बोगस मतदार’ प्रकरणी चौकशी सुरू
अंबरनाथ शहरातील कोहोजगाव परिसरात मतदानासाठी शेकडो महिलांनी एकाच ठिकाणी गर्दी केल्याने संशयाचे वातावरण निर्माण झाले. भाजपने शिंदे गटावर तब्बल २०८ बोगस मतदार आणल्याचा आरोप केला आहे. या महिला व मुलं स्थानिक नसून भिवंडी परिसरातून आणल्याचा दावा भाजपच्या पदाधिकाऱ्यांनी केला. मतदान केंद्राच्या सभागृहात थांबलेल्या या महिलांना पोलिसांनी बाहेर काढले. या महिला कुठून आल्या, त्या बोगस मतदानासाठी आणल्या गेल्या होत्या का, याबाबत पोलीस चौकशी सुरू आहे. या घटनेनंतर काही काळ परिसरात तणावाचे वातावरण होते.
कोपरगाव : मतदान केंद्रावर थेट बाचाबाची
अहिल्यानगर जिल्ह्यातील कोपरगाव येथे एस. जी. महाविद्यालयातील मतदान केंद्रावर भाजप आणि राष्ट्रवादी काँग्रेस (अजित पवार गट) यांच्या उमेदवारांमध्ये जोरदार वाद झाला. मतदारांवर प्रभाव टाकल्याचा आरोप दोन्ही गटांकडून एकमेकांवर करण्यात आला. विशेष म्हणजे, पोलिसांच्या उपस्थितीतच दोन्ही गटांमध्ये शाब्दिक बाचाबाची झाली. परिस्थिती नियंत्रणाबाहेर जाण्याची चिन्हे दिसताच पोलिसांनी हस्तक्षेप करत संबंधित उमेदवार व त्यांच्या प्रतिनिधींना मतदान केंद्रापासून दूर नेले. या घटनेनंतर मतदान केंद्राच्या परिसरात दोन्ही गटांच्या समर्थकांची मोठी गर्दी झाली असून काही काळ तणाव कायम होता.
नांदेड : मतदारांना ‘डांबून’ ठेवल्याचा आरोप
नांदेड जिल्ह्यातील धर्माबाद शहरात मतदानाच्या दिवशीच खळबळ उडवणारी घटना उघडकीस आली. नागरिकांनी केलेल्या आरोपानुसार, काही मतदारांना एका मंगल कार्यालयात कोंडून ठेवण्यात आले होते. सकाळपासूनच पैशांचे आमिष दाखवून मतदारांना तेथे बोलावण्यात आल्याचा दावा करण्यात आला आहे. या प्रकरणात एका आमदारावर थेट आरोप करण्यात येत असून पोलीस प्रशासनाने याची गंभीर दखल घेत चौकशी सुरू केली आहे.
एकूणच, राज्यातील नगरपरिषद निवडणुकांच्या मतदानादरम्यान घडलेल्या या घटनांमुळे निवडणूक प्रक्रियेच्या पारदर्शकतेबाबत प्रश्नचिन्ह उपस्थित झाले आहे. प्रशासनाकडून परिस्थिती नियंत्रणात ठेवण्यासाठी कडक उपाययोजना करण्यात येत असून संबंधित प्रकरणांची स्वतंत्र चौकशी सुरू असल्याची माहिती देण्यात आली आहे.
