मुंबई प्रतिनिधी
डिसेंबर महिन्याची पहाट सामान्य नागरिकांसाठी काही नव्या नियमांसह उजाडत आहे. प्रत्येक महिन्याच्या पहिल्या दिवशीप्रमाणेच या महिन्यातही अर्थकारण, रेल्वे प्रवास, सेवेतील निवृत्त नागरिक आणि घरगुती स्वयंपाकघरांवर थेट परिणाम करणारे बदल लागू होणार आहेत.
एलपीजी सिलेंडरचे नवे दर जाहीर
१ डिसेंबरला तेल कंपन्या घरगुती आणि व्यावसायिक गॅस सिलेंडरच्या दरांमध्ये बदल करतील.
नोव्हेंबरमध्ये १९ किलोच्या व्यावसायिक सिलेंडरवर ६.५० रुपयांची कपात करण्यात आली होती. मात्र १४ किलोच्या घरगुती गॅस सिलेंडरचा दर अनेक महिन्यांपासून स्थिर आहे.
उद्यापासून दर कमी होणार की वाढणार? याकडे देशभरातील गृहिणींचे लक्ष लागले आहे.
आधार अपडेट प्रक्रियेत मोठा बदल
१ डिसेंबरपासून आधारवरील नाव, पत्ता, जन्मतारीख, मोबाईल यांसारखी माहिती पूर्णपणे ऑनलाइन अपडेट करता येणार आहे.
पॅनकार्ड, पासपोर्टसारख्या सरकारी नोंदींच्या आधारे पडताळणी होईल आणि नागरिकांना आधार केंद्रे किंवा पोस्ट ऑफिसमध्ये जाण्याची आवश्यकता राहणार नाही.
या सुविधेमुळे लाखो नागरिकांना मोठा दिलासा मिळणार आहे.
युनिफाइड पेन्शन स्कीममध्ये जाण्यासाठी अंतिम तारीख संपली
एनपीएसमधून युनिफाइड पेन्शन स्कीममध्ये स्थानांतर करण्याची ३० नोव्हेंबर ही अंतिम तारीख होती.
केंद्र सरकारने यापूर्वी एकदा मुदत वाढ दिली होती; पुन्हा वाढ मिळेल का, याबाबत अद्याप स्पष्टता नाही.
तारीख चुकलेल्या कर्मचाऱ्यांना पेन्शन योजनेत बदल करण्याची संधी हातची जाऊ शकते.
रेल्वे तात्काळ तिकीटासाठी अनिवार्य OTP पडताळणी
१ डिसेंबर २०२५ पासून तात्काळ तिकीट बुकिंगसाठी OTP पडताळणी बंधनकारक होणार आहे.
पश्चिम रेल्वेने हा निर्णय घेतला असून प्रवाशांना त्यांच्या मोबाईलवर आलेल्या OTP शिवाय तिकीट जारी केले जाणार नाही.
लांबपल्ल्याच्या प्रवासाचे नियोजन करणाऱ्यांनी हा बदल लक्षात ठेवणे गरजेचे आहे.
पेन्शनधारकांनो, जीवन प्रमाणपत्राची मुदत संपली
पेन्शन चालू राहण्यासाठी आवश्यक असलेल्या जीवन प्रमाणपत्राची अंतिम तारीख ३० नोव्हेंबर होती.
या तारखेनंतर प्रमाणपत्र सादर करता येणार नाही आणि उशीर झाल्यास पेन्शन थांबण्याची शक्यता आहे.
डिसेंबरच्या पहिल्याच दिवशी लागू होणारे हे सर्व बदल नागरिकांच्या दैनंदिन जीवनावर थेट परिणाम करणारे आहेत. त्यामुळे संबंधितांनी आपापल्या सोयीने आणि वेळेत आवश्यक ती पावले उचलणे अत्यावश्यक आहे.
