मुंबई प्रतिनिधी
नाशिकमध्ये 2027 च्या सिंहस्थ कुंभमेळ्याची तयारी जोमात सुरू असताना, तपोवन परिसरात साधुग्रामसाठी 1,150 एकरांवर 1800 झाडांची तोड करण्याच्या निर्णयावरून मोठं वादळ उठलं आहे. पर्यावरणप्रेमी, नागरिक ते सेलिब्रिटी, सर्वांनीच या निर्णयाविरोधात आवाज उठवला आहे. उद्धव ठाकरे यांनी झाडतोडीला कडाडून विरोध केल्यानंतर आता मनसे अध्यक्ष राज ठाकरेही सरसावले असून, सरकारवर थेट उद्योगपतींच्या फायद्यासाठी जमीन सपाट करण्याचा आरोप केला आहे.
राज ठाकरे यांनी फेसबुकवरील पोस्टमध्ये जोरदार शब्दांत सरकारची कडक खबर घेतली. “कुंभमेळा नाशिकमध्ये नवा नाही. आमच्या मनसेच्या महापालिका सत्ताकाळातही कुंभमेळा झाला. त्या काळात पायाभूत सुविधांची उभारणी करताना एकही झाड तोडण्याची वेळ आली नाही. मग आता अचानक 1800 झाडं तोडण्याची गरज नेमकी कुठून आली?” असा सवाल त्यांनी उपस्थित केला.
यापुढे त्यांनी सरकारच्या पर्यायी वृक्षलागवड दाव्यालाही छेद दिला. “झाडं तोडू, नंतर दुसरीकडे लावू, असं पोकळ आश्वासन देऊन काय फायदा? आणि खरंच जर सरकारकडे पाचपट जागा झाडं लावण्यासाठी असेल, तर मग साधुग्रामही तिकडेच करा,” असा परखड सल्ला देत, ‘साधूंंच्या नावाखाली जमीन उद्योगपतींच्या घशात घातली जात आहे,’ असा घणाघात त्यांनी केला.
“जमीन सपाट करा आणि उद्योगपतींना द्या, याचाच विचार दिसतो”
“कुंभमेळ्याचं कारण पुढे करून झाडं तोडायची, जमीन सपाट करायची आणि मग ती एखाद्या लाडक्या उद्योगपतीला बहाल करायची,हेच सरकारचं वास्तववादी नियोजन दिसत आहे. सध्या महाराष्ट्रात जमिनी गिळणं आणि उद्योगपतींना चालून जाणं हाच कारभार सुरू आहे,” असा आरोप करताना त्यांनी सत्ताधाऱ्यांच्या मंत्री-आमदारांनाही टोला लगावला.
“सरकार संघर्ष टाळो; नाशिककरांच्या पाठीशी मनसे”
नाशिककरांनी ठामपणे उभं राहावं, असं आवाहन राज ठाकरे यांनी करत, “या लढ्यात मनसे तुमच्या सोबत आहे. यात आमचं कुठलंही राजकारण नाही. निवडणुका जाऊद्या, पण झाडतोडीला आमचा विरोध कायम राहील,” असं स्पष्ट केलं.
“सरकारने संघर्षाची भूमिका घेऊ नये. लोकांचं ऐकणं, त्यांच्या भावनांचा आदर करणं, हे कधीतरी तरी सरकारने करायलाच हवं. मात्र संघर्ष वाढवला, तर मनसे नाशिककरांसोबत खंबीरपणे उभी राहील,” असा इशारा देत त्यांनी सरकारी नियोजनावर थेट बोट ठेवलं आहे.
