नाशिक प्रतिनिधी
नाशिक जिल्हा पुन्हा एकदा मन हेलावून टाकणाऱ्या घटनेने हादरला आहे. चांदवड तालुक्यातील काजी सांगवी शिवारात ग्रामपंचायत कर्मचाऱ्याने आपल्या दोन चिमुरड्यांसह विहिरीत उडी घेत आत्महत्या केल्याचा भीषण प्रकार सोमवारी उघडकीस आला. कुटुंबातील तणाव, वाढते वाद आणि मानसिक तणाव या सगळ्याचा शेवट इतक्या टोकाच्या निर्णयात होईल, अशी कुणालाही कल्पना नव्हती.
सचिन हिरे (वय अंदाजे ३५), असे आत्महत्या करणाऱ्या ग्रामपंचायत कर्मचाऱ्याचे नाव असून प्रज्ञा सचिन हिरे (१०) आणि प्रज्वल सचिन हिरे (४) ही त्यांची दोन लहान मुले देखील या दुर्दैवी घटनेत मृत्यूमुखी पडली. घराजवळील विहिरीत पित्याने मुलांसह घेतलेली झेप संपूर्ण गावाला असह्य धक्का देणारी ठरली आहे.
घटनेची माहिती मिळताच कुटुंबीय आणि शेजारी धावून आले. परंतु खोल विहीर, मोठा पाणीसाठा आणि तळाशी फसलेला प्रचंड गाळ यामुळे बचावकार्य अत्यंत कष्टाचे ठरले. मृतदेह बाहेर काढण्यासाठी चांदवडजवळील रायपूर येथील खास स्कुबा ड्रायव्हर्सना पाचारण करण्यात आले. तब्बल काही तासांच्या अखंड प्रयत्नांनंतर तिघांचे मृतदेह बाहेर काढण्यात यश आले.
पोलिसांनी तत्काळ पंचनामा करून मृतदेह चांदवड उपजिल्हा रुग्णालयात पोस्टमार्टमसाठी पाठवले आहेत. प्राथमिक माहितीनुसार कुटुंबात गेल्या काही दिवसांपासून वाद सुरू असल्याची चर्चा असून, त्यातूनच सचिन हिरे यांनी हे टोकाचे पाऊल उचलल्याची शक्यता पोलिसांकडून व्यक्त केली जात आहे. मात्र नेमके कारण अद्याप स्पष्ट झालेले नाही. चांदवड पोलिसांकडून तपास सुरू असून कुटुंबीयांचेही जबाब नोंदवले जात आहेत.
दरम्यान, दोन निरपराध मुलांचे असे अकस्मात जग सोडणे आणि एका वडिलांनी तणावात घेतलेला अविचारी निर्णय यामुळे परिसरात हळहळ व्यक्त होत आहे. ग्रामपंचायतीतील सहकाऱ्यांनीही या घटनेवर दु:ख व्यक्त करत, ग्रामीण भागातील वाढत्या मानसिक ताण-तणावावर गंभीर पातळीवर उपाययोजना करण्याची गरज असल्याचे मत व्यक्त केले आहे.
ही घटना पुन्हा एकदा समाजाला प्रश्न विचारते..
अशा वेदनादायी शेवटापर्यंत पोहोचण्याआधी मदतीचे हात कुठे थांबले?
कुटुंबातील तणाव संवादाअभावी इतका प्रचंड कसा बनतो?
नाशिक जिल्ह्यातील ही हृदयद्रावक घटना केवळ एका कुटुंबाचा अंत नसून तुटलेल्या नातेसंबंधांची, वाढत्या मानसिक तणावाची आणि समाजातील मौनाच्या विहिरीत खोल गेलेल्या समस्यांची वेदनादायी आठवण ठरली आहे.
