ठाणे प्रतिनिधी
मध्य रेल्वेच्या सर्वाधिक वर्दळीच्या ठाणे रेल्वे स्थानकात प्रवाशांची उघडपणे लूट होत असल्याचा धक्कादायक प्रकार समोर आला आहे. फलाट क्रमांक १ वरील सार्वजनिक शौचालयात लघुशंकेसाठी कोणतेही शुल्क नसतानाही जबरदस्तीने दोन ते तीन रुपये आकारले जात असल्याचे उघड झाले आहे. पैसे देण्यास नकार दिल्यास कर्मचाऱ्यांकडून “पैसा देना है तो दो, नहीं देना है तो निकलो” अशा उद्धट आणि अरेरावीच्या शब्दांत प्रवाशांशी वागणूक दिली जात असल्याची तक्रार समोर आली आहे.
या प्रकाराची तक्रार ठाणे स्टेशन मॅनेजरांकडे देण्यात आली असूनही अद्याप ठोस कारवाई झालेली नाही, असा आरोप प्रवाशांनी केला आहे.
रेल्वेच्या नियमांनुसार कोणत्याही स्टेशनवर लघुशंकेसाठी शुल्क आकारण्यास परवानगी नसून तरीही ठाण्यासारख्या महत्त्वाच्या स्थानकात हा ‘वसुली व्यवसाय’ उघडपणे सुरू असल्याने प्रवासी संतप्त झाले आहेत. दररोज लाखो प्रवासी वापरत असलेल्या स्थानकावर अशा प्रकारे जादा आकारणी करून प्रवाशांची लूट केली जात असल्याने तात्काळ कारवाईची मागणी होत आहे.
या संदर्भात मध्य रेल्वेचे मुख्य जनसंपर्क अधिकारी प्रवीण पाटील यांच्याशी संपर्क साधण्याचा प्रयत्न अनेकदा करण्यात आला, परंतु त्यांनी प्रतिसाद दिला नाही.
दरम्यान, प्रवाशांचा प्रश्न कायम आहे
“ठाणे स्थानकावरील ही जबरी वसुली थांबणार का? अरेरावी करणाऱ्या कर्मचाऱ्यांवर कारवाई कधी होणार?”
रेल्वे प्रशासनाने तातडीने लक्ष घालून जबाबदारांवर कठोर कारवाई करावी, अशी ठाम मागणी प्रवाशांकडून होत आहे.
