मुंबई प्रतिनिधी
बॉलिवूडमधील ‘ही-मॅन’ म्हणून ओळखले जाणारे ज्येष्ठ अभिनेते धर्मेंद्र (89) यांचे सोमवारी निधन झाले. गेल्या काही दिवसांपासून त्यांची प्रकृती अत्यंत नाजूक होती. घरच्यांच्या विनंतीवरून काही दिवसांपूर्वी त्यांना रुग्णालयातून डिस्चार्ज देण्यात आला होता आणि राहत्या घरीच त्यांच्यावर उपचार सुरू होते. अखेर आज त्यांनी अखेरचा श्वास घेतला.
धर्मेंद्र यांच्या निधनाची अधिकृत घोषणा देओल कुटुंबीयांकडून करण्यात आलेली नाही. मात्र दुपारी साडेबाराच्या सुमारास त्यांच्या जुहू येथील निवासस्थानी अचानक रुग्णवाहिका पोहोचल्याने चाहत्यांमध्ये खळबळ उडाली. घराबाहेर सुरक्षा वाढवण्यात आली, नातेवाईकांची ये-जा सुरू झाली. त्याचदरम्यान विले पार्ले येथील पवनहंस स्मशानभूमीत हेमा मालिनी आणि ईशा देओल दिसल्याने परिस्थिती स्पष्ट झाली.
काहीच क्षणात अंत्यसंस्काराची प्रक्रिया पार पडली. अवघ्या अर्ध्या तासांत धर्मेंद्र यांच्यावर अंत्यसंस्कार करण्यात आले आणि त्यांचे ज्येष्ठ चिरंजीव सनी देओल यांनी मुखाग्नी दिला. सहा दशकांहून अधिक काळ हिंदी सिनेसृष्टीवर अधिराज्य गाजवणारा हा दिग्गज कलाकार अनंतात विलीन झाला.
अफवा, रुग्णालयातून डिस्चार्ज आणि चाहत्यांमध्ये संभ्रम
१२ नोव्हेंबर रोजी धर्मेंद्र यांना ब्रीच कँडी रुग्णालयातून घरी हलवण्यात आले. त्यानंतर त्यांच्या प्रकृतीबाबत अनेक अफवा सोशल मीडियावर पसरू लागल्या. या अफवांवर देओल कुटुंबीयांनी तीव्र नाराजी व्यक्त केली होती.
सनी देओल यांचा पॅपाराझींशी झालेला वादग्रस्त व्हिडिओ सोशल मीडियावर चर्चेचा विषय ठरला होता. ईशा देओल आणि हेमा मालिनी यांनीही पोस्टद्वारे विनाकारण पसरवल्या जाणाऱ्या अफवांवर पडदा टाकण्याचे आवाहन केले होते.
दरम्यान, सोमवारीच धर्मेंद्र यांच्या आगामी ‘इक्‍कीस’ या चित्रपटातील त्यांच्या भूमिकेचे नवे मोशन पोस्टर प्रदर्शित करण्यात आले. यात त्यांचा आवाज असलेली व्हॉइस नोटही समाविष्ट आहे. हा आवाज ऐकून चाहते भावूक झाले.
धर्मेंद्र यांच्या जाण्याने भारतीय चित्रपटसृष्टीने आपल्या सुवर्णकाळातील एक भक्कम आधारस्तंभ गमावला आहे. त्यांच्या अभिनयाची छाप, अढळ व्यक्तिमत्त्व आणि चाहत्यांवरील अपार प्रेम पुढील अनेक वर्षे स्मरणात राहणार आहे.
