मुंबई प्रतिनिधी
शिवसेनाप्रमुख हिंदूहृदयसम्राट बाळासाहेब ठाकरे यांच्या १३व्या स्मृतीदिनी शिवाजी पार्क परिसर आज पहाटेपासून शिवसैनिकांच्या जयघोषाने दणाणून गेला. स्मृतीस्थळावर आकर्षक फुलांची आरास, बाळासाहेबांच्या प्रतिमेसमोर ओसंडून वाहणारी निष्ठा आणि दिवसभर सुरू असलेली भाविकांची रांग,अशा वातावरणात शिवसेनेचे खासदार संजय राऊत यांनी प्रकृतीच्या तक्रारींवर मात करत विशेष उपस्थिती दर्शवली.
गंभीर आजारामुळे काही दिवसांपासून सार्वजनिक जीवनापासून दूर असलेल्या राऊत यांचे आगमन होताच शिवसैनिकांमध्ये उत्साहाची लाट उसळली. सकाळी सुमारे साडेदहा वाजता ते स्मृतीस्थळ परिसरात दाखल झाले. मास्क लावलेले, चालताना जाणवणारा त्रास स्पष्ट दिसत असला तरी, भावनेच्या ओढीने त्यांनी बाळासाहेबांना अभिवादन केले. त्यांच्या आगमनावेळी “कोण आला रे कोण आला, शिवसेनेचा वाघ आला” या घोषणा घुमल्या.
राऊत यांना त्यांचे बंधू सुनील राऊत यांनी आधार देत स्मृतीस्थळापर्यंत नेले. ऐरवी उत्साही आणि ठणठणीत दिसणाऱ्या राऊत यांच्या वेशभूषेतही काहीसा बदल जाणवत होता. नुकतेच त्यांनी सार्वजनिक कार्यक्रमांपासून ब्रेक घेऊन पुढील वर्षी पुन्हा सक्रिय होण्याची घोषणा केली होती. त्यानंतरची ही त्यांची पहिलीच सार्वजनिक भेट.
राऊत यांचे ट्वीट : ‘जे घडवले, त्या पुरुषसिंहाला प्रणाम’
“ज्यांच्यामुळे मी घडलो, असे एकमेव शिवसेना प्रमुख बाळासाहेब ठाकरे यांना मानवंदना! असा पुरुषसिंह होणे नाही,” असे राऊत यांनी ट्वीट करून कृतज्ञता व्यक्त केली. “मराठी माणसाने एकजूट राखून महाराष्ट्राच्या शत्रूंशी लढणे हीच खरी आदरांजली” असेही त्यांनी लिहिले.
ज्यांच्यामुळे मी घडलो
असे एकमेव शिवसेना प्रमुख बाळासाहेब ठाकरे यांना मानवंदना!
असा पुरुष सिंह होणे नाही!मराठी माणसाने एकजुटीने राहावे
आणि महाराष्ट्र शत्रूंशी लढावे हीच त्यांना आदरांजली!
साहेब,
जय महाराष्ट्र! pic.twitter.com/j77ALrc7vv— Sanjay Raut (@rautsanjay61) November 17, 2025
स्मृतीदिनाच्या कार्यक्रमासाठी सकाळपासून मोठी गर्दी झाली असल्याने परिसरात कडक पोलीस बंदोबस्त ठेवण्यात आला होता. दिवंगत बाळासाहेबांना अभिवादन करण्यासाठी उद्धव ठाकरे आणि राज ठाकरे यांनी एकत्र उपस्थित राहून आदरांजली वाहिली. विविध राजकीय नेते आणि शिवसैनिकांची उपस्थिती दिवसभरात लक्षणीय होती.
बाळासाहेबांच्या स्मृतीदिनानिमित्त शिवाजी पार्क पुन्हा एकदा शिवसैनिकांच्या निष्ठा, भावना आणि परंपरेचा साक्षीदार ठरला.
