पुणे प्रतिनिधी
पिंपरी परिसरात दोन दिवसांपूर्वी घडलेल्या नितीन गिलबिले हत्या प्रकरणात पोलिस तपासाने नवे वळण घेतले आहे. वडमुखवाडी–अलंकापूरम रस्त्यावर फॉर्च्युनर गाडीत झालेल्या या खुनामागे केवळ दोन नव्हे, तर चार जणांचा सहभाग असल्याचे तपासात स्पष्ट झाले आहे. या चौघांनी मिळून आखलेल्या योजनेंतर्गत गिलबिले यांची निर्घृणपणे हत्या करण्यात आल्याचे पोलिसांनी सांगितले.
एका व्यावसायिकाला कारमध्ये बसवून त्याच्यावर गोळ्या झाडून त्याचा खून केला. या घटनेचे सीसीटीव्ही फुटेज समोर. कारमध्ये गोळी झाडून नितीन गिलबिले यांचा खून केला. त्यानंतर रस्त्याच्या कडेला नितीन यांचा मृतदेह टाकून संशयित कार घेऊन पसार झाले#Punenews #crimenews pic.twitter.com/vb4k88MOTQ
— Ankita Shantinath Khane (@KhaneAnkita) November 14, 2025
सुरुवातीच्या तपासात अमित पठारे आणि विक्रांत ठाकूर यांची नावे समोर आली होती. तिघांमध्ये कारमध्येच झालेल्या वादातून दोघांनी पिस्तुलातून गोळ्या झाडत गिलबिले यांचा खात्मा केला. त्यानंतर मृतदेह बाहेर फेकून त्यांच्या पायांवरून कार घालून आरोपी पसार झाले. मात्र पुढील तपासात सुमित पटेल आणि आकाश पठारे या दोघांचाही कटात सहभाग असल्याचे निष्पन्न झाले. चारही आरोपींवर गुन्हा नोंद असून अमित पठारे आणि विक्रांत ठाकूर यांना न्यायालयाने 21 नोव्हेंबरपर्यंत पोलीस कोठडी सुनावली आहे. उर्वरित दोघांना आज न्यायालयासमोर हजर करण्यात येणार आहे.
पिंपरी–चिंचवडचे पोलीस उपायुक्त मारुती जगताप यांनी पत्रकार परिषद घेत प्रकरणाचा तपशील उलगडला. “प्रकरणाच्या प्राथमिक तपासात दोन आरोपी आढळले होते. मात्र पुढील चौकशीत आणखी दोन आरोपी सापडले आहेत. वापरण्यात आलेले शस्त्र अद्याप मिळाले नसून त्याबाबत शोधमोहीम सुरु आहे,” असे त्यांनी सांगितले.
आर्थिक वादातून हत्या?
खून नेमका कोणत्या कारणातून झाला, याबाबत अनेक तर्कवितर्कांना आता विराम मिळत आहे. “प्राथमिकदृष्ट्या आर्थिक व्यवहाराच्या वादातून ही घटना घडल्याचे कळते. वादाची जडणघडण, तो नेमका कधीपासून सुरू होता, याबाबत तपास सुरू आहे. कट किती दिवसांपासून रचला जात होता, हेही पुढील चौकशीत स्पष्ट होईल,” असे जगताप म्हणाले.
दरम्यान, अटकेत असलेले दोघे आरोपी रेकॉर्डवरील गुन्हेगार असून त्यांच्या विरुद्ध यापूर्वीही विविध गुन्हे दाखल असल्याचे पोलिसांनी स्पष्ट केले. खुनासाठी वापरण्यात आलेली फॉर्च्युनर कार ही अमित पठारे याच्या मालकीची होती. विक्रांत ठाकूरला लोणावळा तर अमित पठारेला वाघोलीतून अटक करण्यात आली.
आर्थिक वाद, संपत्तीचे मुद्दे की आणखी काही गुंतागुंत? या प्रकरणामागील खरा हेतू पोलिसांच्या पुढील तपासानंतर उघड होणार आहे.
