मुंबई प्रतिनिधी
राज्यातील स्थानिक स्वराज्य संस्थांच्या निवडणुकांचा बिगुल अखेर वाजला असून, गेल्या आठवड्यात निवडणूक आयोगाने पत्रकार परिषद घेत निवडणुकांच्या तारखा जाहीर केल्या आहेत. येत्या २ डिसेंबर रोजी मतदान, तर ३ डिसेंबर रोजी निकाल घोषित होणार आहे. यानंतर राजकीय पक्षांनी निवडणूक रणसज्जा सुरू केली असून, आता आयोगाने पक्षांच्या निवडणूक चिन्हांची यादी प्रसिद्ध केली आहे.
राज्य निवडणूक आयोगाने शिवसेना (ठाकरे गट), शिवसेना (शिंदे गट) आणि राष्ट्रवादी काँग्रेस (अजित पवार – शरद पवार गट) यांच्या चिन्हांची नवी नोंदणी जाहीर केली आहे. आयोगाने राज्यातील एकूण ४३५ पक्षांची नवी यादी प्रसिद्ध करत त्यांच्या चिन्हांचं वाटप केलं आहे.
• कोणाला मिळालं कोणतं चिन्ह?
राजपत्रात जाहीर करण्यात आलेल्या यादीनुसार
• शिवसेना (ठाकरे गट) मशाल
• शिवसेना (शिंदे गट) धनुष्यबाण
• राष्ट्रवादी काँग्रेस (अजित पवार) घड्याळ
• राष्ट्रवादी काँग्रेस (शरद पवार) तुतारी वाजवणारा माणूस
या चारही चिन्हांना निवडणूक आयोगाने अधिकृत मान्यता दिली आहे. मात्र, दोन्ही पक्षांच्या नाव आणि चिन्हांवरील अंतिम निर्णय सर्वोच्च न्यायालयाच्या निकालावर अवलंबून असेल, अशी स्पष्ट नोंद आयोगाने केली आहे.
• राष्ट्रवादी काँग्रेसला दिलासा
न्यायालयाच्या आदेशानंतर आयोगाने राष्ट्रवादी काँग्रेस (शरद पवार गट) ला तुतारी वाजवणारा माणूस हे चिन्ह दिलं आहे. लोकसभा निवडणुकीत तुतारी वाजवणारा माणूस आणि पिपाणी अशी दोन चिन्हं असल्याने मतदारांमध्ये संभ्रम निर्माण झाल्याचा आरोप पवार गटाने केला होता. अखेर आयोगाने ‘पिपाणी’ हे चिन्ह रद्द करून फक्त तुतारी वाजवणारा माणूस हे चिन्ह कायम ठेवले, त्यामुळे पवार गटाला मोठा दिलासा मिळाल्याचं समजतं.
• आरक्षणानंतरचा जल्लोष
दरम्यान, आरक्षण जाहीर झाल्यानंतर इच्छुक उमेदवारांकडून जल्लोष सुरू झाला आहे. शिवसेना (ठाकरे गट) चे माजी नगरसेवक सचिन पडवळ यांच्या समर्थकांनी शिवडीतील प्रभाग क्रमांक २०६ सर्वसाधारण गटासाठी जाहीर झाल्यानंतर फटाके फोडून आनंद व्यक्त केला.
२०१७ मध्ये याच प्रभागातून निवडून आलेले पडवळ पुन्हा निवडणुकीच्या मैदानात उतरण्याच्या तयारीत आहेत. स्थानिक कार्यकर्त्यांनी त्यांचे अभिनंदन करून प्रचार मोहीमेची सुरूवात केली आहे.
निवडणूक कार्यक्रम, आरक्षण आणि चिन्हवाटप जाहीर झाल्याने राज्यातील सर्वच राजकीय पक्ष आता पूर्ण ताकदीने रणांगणात उतरले आहेत.
