मुंबई प्रतिनिधी
राज्यातील आगामी महानगरपालिका निवडणुकांची धामधूम सुरू झाली आहे. आज (मंगळवार) महत्त्वाच्या सहा महानगरपालिकांची पिंपरी चिंचवड, वसई-विरार, जालना, चंद्रपूर, नांदेड आणि मालेगाव, आरक्षण सोडत जाहीर झाली. महिलांसाठी ५० टक्के जागा राखीव ठेवण्यात आल्याने अनेक दिग्गज पुरुष उमेदवारांना धक्का बसण्याची शक्यता आहे. प्रत्येक प्रवर्गानुसार आरक्षणाचे प्रमाण निश्चित करण्यात आले असून, अनेक प्रभागांमध्ये महिला उमेदवारांचा दबदबा दिसणार आहे.
• वसई-विरार महानगरपालिका
वसई-विरार महापालिकेच्या २९ प्रभागांमधील एकूण ११५ जागांसाठी आरक्षण जाहीर करण्यात आले आहे.
महिलांसाठी ५८ जागा राखीव
अनुसूचित जाती (SC): ५ जागा, त्यापैकी ३ महिलांसाठी
अनुसूचित जमाती (ST): ५ जागा, त्यापैकी ३ महिलांसाठी
ओबीसी: ३१ जागा, त्यापैकी १६ महिलांसाठी
सर्वसाधारण: ७४ जागा, त्यापैकी ३६ महिलांसाठी
महिला आरक्षणाचा फटका सर्वसाधारण पुरुष उमेदवारांना बसला असून, २९ पैकी १६ प्रभागांमध्ये केवळ एकच जागा सर्वसाधारण पुरुषांसाठी खुली राहिली आहे.
• जालना महानगरपालिका
जालना शहरातील १६ प्रभागांतील ६५ जागांसाठी आरक्षण जाहीर झाले आहे.
अनुसूचित जाती: ८ जागा (४ महिलांसाठी)
अनुसूचित जमाती: १ जागा (१ महिला)
ओबीसी: १७ जागा (९ महिलांसाठी)
सर्वसाधारण: ३९ जागा (१९ महिलांसाठी)
महिला उमेदवारांचा मोठा वाटा असल्याने जालन्यातील निवडणूक समीकरणे बदलण्याची शक्यता आहे.
• पिंपरी चिंचवड महानगरपालिका (PCMC)
एकूण १२८ जागांसाठी आरक्षण निश्चित करण्यात आले आहे.
सर्वसाधारण महिला – ३५
इतर मागास प्रवर्ग (OBC) महिला – १८
अनुसूचित जाती महिला – १०
अनुसूचित जमाती महिला – २
सर्वसाधारण पुरुष – ६४
पिंपरी-चिंचवडमध्येही महिलांसाठी अर्ध्या जागा राखीव राहणार असून, राजकीय पक्षांसमोर उमेदवार निवडीचे आव्हान उभे राहणार आहे.
• चंद्रपूर महानगरपालिका
६६ जागांसाठी आरक्षण सोडत जाहीर झाली आहे.
सर्वसाधारण महिला – १४
ओबीसी महिला – ९
अनुसूचित जाती महिला – ७
अनुसूचित जमाती महिला – ३
सर्वसाधारण पुरुष – ३३
चंद्रपूरमध्ये महिला आरक्षणामुळे अनेक अनुभवी नगरसेवकांना बाजूला राहावे लागणार आहे.
* मालेगाव महानगरपालिका
२१ प्रभागांमधील ८४ नगरसेवकांची निवड होणार आहे.
५० टक्के जागा महिलांसाठी
२२ जागा मागास प्रवर्गासाठी राखीव
महापौरपदही महिलांसाठी राखीव राहण्याची शक्यता व्यक्त केली जात आहे. मालेगावमध्ये या आरक्षणानंतर स्थानिक पातळीवरील राजकीय समीकरणांमध्ये मोठा फेरबदल अपेक्षित आहे.
• नांदेड महानगरपालिका
एकूण ८१ जागांसाठी आरक्षण सोडत जाहीर झाली.
अनुसूचित जाती: १५ जागा (८ महिलांसाठी)
अनुसूचित जमाती: २ जागा (१ महिला)
ओबीसी: २१ जागा (११ महिलांसाठी)
सर्वसाधारण: ४३ जागा (२१ महिलांसाठी)
नांदेडमध्येही महिलांचा वर्चस्व असलेला निवडणूक नकाशा तयार झाला असून, स्थानिक पक्ष संघटनांमध्ये हालचाल सुरू आहे.
महिलांचा दबदबा, पुरुष उमेदवार चिंतेत
राज्यातील या सर्व सहा महापालिकांच्या आरक्षण सोडतीत महिलांसाठी ५० टक्क्यांपर्यंत जागा राखीव ठेवल्याने निवडणुकीचा रंग महिलांच्या सहभागाने खुलणार आहे. मात्र अनेक प्रभागांमध्ये पुरुष उमेदवारांना वंचित राहावे लागल्याने त्यांच्या तोंडचे पाणी पळाले आहे. आगामी काही दिवसांत पक्षांतर्गत उमेदवारीसाठी चुरस रंगण्याची चिन्हे आहेत.
