मुंबई प्रतिनिधी
महाराष्ट्राच्या राजकारणात आज (१० नोव्हेंबर) काँग्रेसने मोठी चाल खेळली आहे. पक्षाचे ज्येष्ठ नेते आणि आमदार विजय वडेट्टीवार यांनी मुंबई महानगरपालिकेच्या आगामी निवडणुकीसंदर्भात काँग्रेस स्वबळावर लढणार असल्याची अधिकृत घोषणा केली आहे.
जगातील सर्वात मोठ्या महानगरपालिकांपैकी एक असलेल्या मुंबई महापालिकेवर सत्ता मिळवण्यासाठी सर्वच पक्ष झटत असताना, काँग्रेसने स्वबळाचा नारा देत इतर पक्षांना धक्का दिला आहे.
* स्वबळावर लढणार काँग्रेस
“मुंबई महानगरपालिकेतील आमचे नेते आणि कार्यकर्त्यांनी ठरवले आहे की, आम्ही ही निवडणूक स्वतंत्र लढणार आहोत. त्यामुळे जागा वाटपाचा प्रश्नच येत नाही,” असे वडेट्टीवार यांनी स्पष्ट केले.
हा निर्णय स्थानिक पातळीवरील चर्चेनंतर पक्ष हाय कमांडच्या संमतीने घेण्यात आल्याचे त्यांनी सांगितले.
‘विभाजनाची भीती आम्हाला नाही’
वडेट्टीवार यांनी मतांच्या विभाजनावर विरोधकांना थेट सवाल केला.
“आम्ही मुंबईत नेहमी लढलो आहोत. आमच्या ३० ते ३५ जागा आम्ही दरवेळी जिंकतो. जर महायुतीचे तीन पक्ष वेगळे लढत असतानाही त्यांचे मतविभाजन होत नाही, तर आमचं झालं तरी एवढं मोठं काय?” असा प्रश्न त्यांनी उपस्थित केला.
‘जिंकणे आमचा उद्देश नाही’
वडेट्टीवार यांनी या निर्णयामागची भूमिका स्पष्ट करताना म्हटलं,
“जिंकणे हा आमचा मुख्य उद्देश नाही. कार्यकर्त्यांना न्याय देणे, त्यांना निवडणुकीत संधी देणे, हाच आमचा हेतू आहे. काँग्रेसचा पाया कार्यकर्त्यांमध्ये आहे, त्यांचं मनोबल वाढवणं आम्हाला महत्त्वाचं वाटतं.”
* महाविकास आघाडीबाबत खुला दरवाजा
आगामी निवडणुकीला अजून वेळ असल्याचे सांगत वडेट्टीवार म्हणाले,
“जर समविचारी पक्षांकडून एकत्र लढण्याचा प्रस्ताव आला, तर आम्ही तो नक्कीच विचारात घेऊ.”
* नाशिकमध्ये वेगळं चित्र
मुंबईत काँग्रेसने स्वबळ दाखवले असले, तरी नाशिकमध्ये मात्र वेगळी राजकीय समीकरणं तयार होताना दिसत आहेत.
महाविकास आघाडी आणि मनसेचे स्थानिक नेते एकत्र येण्याच्या तयारीत असून, ‘महायुती’चा पराभव करण्यासाठी ‘महागठबंधन’ उभं करण्याचा निर्णय घेण्यात आला आहे.
* राजकीय समीकरणात नवी चाचपणी
मुंबईत काँग्रेसने स्वबळावर लढण्याचा निर्णय घेतला असला तरी, राज्यातील इतर शहरांमध्ये आघाडीवाले प्रयत्न सुरूच राहणार आहेत.
एका बाजूला मुंबईत स्वबळ दाखवण्याची तयारी, तर दुसरीकडे नाशिकसारख्या शहरांत ‘महाविकास आघाडी + मनसे’ अशा नव्या समीकरणांचा पाया, यामुळे महाराष्ट्राच्या राजकारणात नवी चाचपणी सुरू झाली आहे.
