सातारा प्रतिनिधी
सातारा येथे भाजपच्या जिल्हा कोअर कमिटी आणि मंडळ अध्यक्षांची महत्त्वपूर्ण बैठक नुकतीच फर्न हॉटेल येथे संपन्न झाली. आगामी लोकसभा, विधानसभा तसेच महापालिका निवडणुकांच्या पार्श्वभूमीवर पक्ष संघटन मजबूत करण्यासाठी ही बैठक अत्यंत महत्त्वाची ठरली.
या बैठकीला माजी खासदार उदयनराजे भोसले, बांधकाम मंत्री शिवेंद्रराजे भोसले , राज्याचे मंत्री जयकुमार गोरे, जिल्हाध्यक्ष अतुलभाऊ भोसले, आमदार मनोज घोरपडे, तसेच विक्रम पावसकर, माजी खासदार रणजितसिंह नाईक-निंबाळकर, धैर्यशील कदम, आनंदराव पाटील, चित्रलेखा माने, प्रियाताई शिंदे यांच्यासह सर्व जिल्हा पदाधिकारी आणि मंडळ अध्यक्ष मोठ्या संख्येने उपस्थित होते.
बैठकीत पक्ष संघटनाचे बळकटीकरण, नव्या सदस्यांचा सहभाग, मतदार संपर्क मोहिमांची आखणी आणि स्थानिक स्वराज्य संस्थांमधील तयारी या विषयांवर सविस्तर चर्चा झाली. पक्षाच्या तळागाळातील कार्यकर्त्यांना चालना देण्यासाठी आणि आगामी निवडणुकांसाठी ठोस रणनीती आखण्यासाठी या बैठकीचा उपयोग करण्यात आला.
सातारा जिल्ह्यात भाजपचा जनाधार वाढविण्यासाठी सर्व स्तरांवर समन्वयाने काम करण्याचे आवाहन पदाधिकाऱ्यांकडून करण्यात आले. बैठकीदरम्यान जिल्हा आणि तालुका स्तरावरील संघटनात्मक घडामोडींवरही सविस्तर आढावा घेण्यात आला.
भाजपच्या आगामी निवडणूक मोहिमेची दिशा ठरवणारी ही बैठक असल्याचे निरीक्षण राजकीय वर्तुळात व्यक्त होत आहे.
